23/05/2023
「藝人」投資餐館多失敗
今次標題,為乜藝人要加引號?
因為,藝人其實可以變為醫生、律師、教師、高官、政客、球星……,總之,就是出身不是飲食界的人物!
上周娛樂版大字頭條,指某幾當時得令藝人合資開餐廳,上月啟業,但很快已經麻煩找上門,被指爆出金錢糾紛。
三子夾份做生意,短短一個月已經傳出不利消息,希望是假的啦。
內情未全面透露,且看逐步如何發展。
近年出席不少退休人士分享會,其中小弟再三叮囑任何專業人士,尤其公務員出身的,切勿切勿退休後投資做生意,尤其是餐館!
因為,佢地捱足一世才有幾百萬退休金,最佳方法是安安全全買政府年金、銀髮債券、公用股,令自己立於不敗之地,每月穩定收息,安安全全到人生終點。
但若一時手痕,試下做生意,咁就弊。因幾百萬(當然更要夾份)投資,可以極短時間化為烏有。因為,你無知,即時會變水魚,任劏,然後,付出「血淋淋的學費」。
事實,大家可有見過律師、醫生、明星經營餐館能成功,又年復一年賺大錢的呢?
我識人相當多,可惜,真係未見過。但說蝕到雞毛鴨血的例子,則見盡不少!
律師、醫生及明星,當紅的,搵錢易,在自己行頭巴巴閉,當然以為才華蓋世。兼且,賺下大量現金,自然心癢癢搵投資。
曾志偉多年來在內地及香港投資飲食業蝕去的錢,等於TVB工作的N倍年薪。
謝賢曾經營「啤酒城」,結果Total Loss。
馬德鐘投資的蠔吧,也極速結業。
香港有萬千「餐館蛇」(專透過幫人搞餐館搵食,瓣瓣賺佣,恰投資者唔熟行,冇時間,於是,在籌組過程中大掠特掠!),專引富有專業人士夾份投資,揚言做飲食生意,有大量現金收入,且香港大部分人乃為食鬼,只要有出色廚師(佢大把介紹),自然客似雲來,火速回本!「餐館蛇」為得水魚信任,再出一招:咁好搵,我也入股!
每人夾一千幾百萬。開業時,當然風風光光,娛樂版大幅報道,親朋戚友又或粉絲湧到,慕名而來幫襯。
發展落去會如何?「餐館蛇」由零開始掠水,由設計裝修到購買廚具,再到樓面設計及生財用具,全部過水狂濕腳,早已在眾多股東矇查查下賺去數百萬。然後,開張後,再夾埋廚房大佬及樓面經理,堅持做所有食材及物料買手,日日賺佣。更無恥的,將名貴食材天一半地一半運走。
一間酒樓,由零開始搞設計裝修,再到購置各類器材,動輒幾千萬。無知的外行人若儍下儍下學人「投資」,可以火速蝕死仍未天光!
眾多股東,包括律師醫生明星,本業忙到失魂,那來時間監察?事實,佢哋對飲食業運作也相當無知!
「餐館蛇」與蠱惑廚師的最大目的,是以最短時間吸乾一眾股東投資後,立即起身去搵第二條群水魚。
李龍基當紅時收入天文數字,但胡亂投資酒廊及酒樓,也極速蝕去雙倍的「天文數字」,搞到借貴利及拍三級片還債。
以上事件,多年來我見盡一次又一次上演。但一次又一次有傻佬入籠任劏。
人生,就是一個不斷交學費的旅程!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇