29/11/2022
沒有觸動?我私人回水!
雖然自己的兩個「粉絲頁」fanpage 開始了四年多後,已累積11萬追蹤者。但有一樣事,仍不太想做——看留言。
因留言板非常似一個無望又負面的發洩世界,充斥haters。呢類一面倒言論睇得多,壞心情外,亦影響價值觀。
我的Fan Page開宗明義冇興趣應酬心態黑暗的Haters。但網上世界,仍有不少硬撞入來。
間中,我亦有多少「同情」呢群留言者,為何天天活在「黑洞」似的世界,積下火山般的情緒?小弟每日post出去的帖,絕大部分都正面積極的,其實只想盡點綿力,話俾大群留言haters知,世界並不是如佢哋眼中般只黑冇白的。
Haters的恐怖,在內心長期活在黑暗中,故看甚麼,也是無望的。
對,你叫我今時今日「唱好」香港,真係「難於啟齒」。但若你話香港完全無望,又絕難苟同。因在各行各業中,仍見到大量「陽光」一樣的人物,不單自己堂堂正正健健康康的活下去。更在有餘力時,扶一把身邊的年青人,協助佢地成長。
真實世界,有黑有白,「陽光人物」不少,帶來希望與快樂,例如傅家俊、古天樂、毛舜筠及何詩蓓。
例如,影圈中的古天樂及毛舜筠。前者事蹟,毋須再多介紹 。後者呢?更有俠女之風。事實,剛剛上畫的一套極優質本土電影《過時.過節》,若冇毛毛的義務拔刀相助,後果必定沒有如今的出色。
一個年青導演曾慶宏(33歲),揸住一個自己執筆,充滿個人經歷的劇本,需要位高卡士中年女演員,能演活別人的女兒、老婆、阿媽,家姐,而每種關係,都充滿激情愛恨及矛盾。香港影圈之中,有幾多選擇?加上,只得三百多萬製作費!
「女俠」毛舜筠一睇劇本,二話不說,承諾零片酬演出。全套電影,由頭帶到尾,相信,下屆電影金像獎,好難唔做影后了。
睇完《過時.過節》,我也願意獻出些微力量。就在社交平台上公然承諾——瞓身推薦大家入場欣賞。睇完唔滿意?冇觸動?我私人回水!
今次「重施故技」,再瞓身推介《過時.過節》這套有意思好戲,唔滿意,我回水!
上次有此承諾,為碰上另一套賞心悅目本土電影《緣路山旮旯》。此片出閘麻麻,我一睇,嘩,若票房唔掂,真係嘥料。故此「瞓身推薦」。
早年瞓身推介《緣路山旮旯》,聲明睇完不滿意,私人回水!
好啦,今次,又揾到第二套足以承諾「若果唔得我私人回水」的好電影。
欣賞此片,除毛毛極品級演出、曾慶宏導演的才華之外,幾乎所有演員,都令人眼前一亮。
首先謝君豪,演活了無數中年男人的際遇。好多人問:「點解男人婚後會越來越沉默寡言的呢?」想知,睇睇戲中的謝君豪就會明白。
另一閃亮的,是演曾慶宏導演真身的呂爵安。很高興,見到Mirror成員,一個一個展露潛質才華。Edan肯定是個有前途、有天份的演員。
劇中的Edan ,演技令人眼前一亮。
若果睇完《過時.過節》沒有觸動感覺,話我知,一定私人回水!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票