前日，手機彈出一條片，乃一位早年恩師的單人獨白。

　　係乜？正是母校聖若瑟書院今年慶祝146周年（其實，咁「老」，真要年年慶祝！ ）。昔日校長柏得烈修士（Brother Patrick），今年80歲了，專誠錄了一段賀詞俾所有「約瑟仔」（Josephians）睇，細說母校精神。

　　這條片，就將我帶回1965至1972 ，一段非常重要的成長日子。其時的教育方法，與現今非常不同。單講一樣，今天已不能再用——體罰（真係打到飛起！）。

六十年代男校，體罰閒過立秋。

　　聖若瑟是男校，鼓吹自由精神。自由的好處，是人人可以按自己的天份及性格成長。包括穿著校服及髮型，也不似其他學校限死。

　　高年班的，更可自由上課或不上課，尊重每個學生的選擇。

聖約瑟書院風氣自由，上世紀六十年代已不管制長頭髮。

　　那麼，壞處又如何？正是不少意想不到的百厭行為，都會出現。包括煙、酒、賭，甚或男女關係，與別校打交等等。

　　人人都在跌跌碰碰中成長。結果，在自由風氣下，超過九成會成材，入讀香港及海外大學，成為社會棟樑。兼且，自動自覺在代表學校參加校際比賽時，自我發奮維護母校聲譽，唔輸得之下不停狂操。

香港無數社會楝樑皆「聖Joe仔」，例如夏佳理、林健鋒及駱應淦。

　　柏德烈修士來港時，只有22歲。就此，將一生青春獻及香港教育。香港人，真的要好好衷心向大群無私奉獻的教士衷心致謝。

　　Brother Patrick年青時英俊有型，極似巨星格力哥利柏。來自英國，當然是足球愛好者，非常好波，亦負責帶領校隊作賽。

柏德烈修士，年青時，比巨星格力哥利柏更有型。

　　小弟有幸，被收納成校隊丙組一員。只是，因身材肥胖，故被修士指定加操。

　　慘咯，每日放學，俾佢捉去做掌上壓。大佬，好惡捱啫。但修士乃猛男教練，手執繩作鞭。我一偷懶，立即鞭如雨下，打到屁股開花！

　　呢種操練方式，在今天，可能已被學生父母告上法庭，教練因虐待學生罪名判監！

　　小弟感覺又如何？絕不介意。嚴師出高徒，「唔打唔知潛質高」。結果，俾修士一逼，減肥增高，成為校隊「鐵衛」。取得人生中第一次的英雄感。

　　間中早上揸車經過九龍喇沙書院（佢在那裏做監督），仍見柏德烈修士在晨運。80歲的鐵血猛男，絕沒停下的一刻！

香港人，應該衷心感謝大群為香港教育獻身的喇沙會修士，不少極偉大。