今日這個標題，有點乞人憎，又有點倒米，各方君子若有得罪，唔好意思。因為，小弟寫這欄，有責任為即將退休或經已退休者，就算未能增值，亦要保住財富，不要蝕寃枉錢。我寫的，是我數十年親身經歷及深入觀察。

　　投資顧問，十有九個搵笨，那麼，第十個是誰？本欄拍檔羅國森是也。此君的確投資有道，人品亦屬可信靠一類，識佢廿幾年，沒有值得懷疑之處。

　　我有資格講投資顧問，因上世紀七十年代自己做過，深知其運作情況及行業心態。投資顧問最大目標是甚麼？先為客弁利或是先為自己弁利？儍的也懂，當然最重要為自己搵錢，其次，才顧及客人賺蝕。

　　投資顧問賺的錢從何來？簡單，顧問費及佣金。顧問費，賺硬你的！佣金呢？則必定要又買又賣才可取得。故此，絕少投資顧問會儍到幫你做定期或買盈富基金(02800)，然後等派息。若如此，食西北風乎？所以，必定會不停替你尋找「優質投資機會」又買又賣，先賺你大筆佣金。明乎此，就應理解投資顧問，其實大部分時間，與客人有先天性「利益衝突」！

　　當我了解投資顧問生涯特色後，第一時間放棄，因難過到自己一關，兼且，之後不再靠投資顧問，加上，記錄顯示，小弟的投資業績，比絕大部分基金經理優勝也。

　　今日寫呢個話題，因最近與香港最大公共事業集團CEO晚飯，兩杯到肚，佢話：「集團已進入退休高峰期，因戰後Baby Boomer 排隊退休。退休者，多已服務幾十年，所以退休金一筆過領取，全部以百萬計，這個非常危險！」

　　為何危險？無他，香港騙棍特多，各行各業皆有，商界尤其犀利，條條棍等水魚。最慣用的技巧，為氹你入股做生意，例如酒樓餐廳或零售店，透過這樣那樣方法替你蝕光，變相將錢移入自己口袋，鬼叫你不知商界險惡！

　　另外，CEO亦逐一叮囑退休員工，拿着幾百萬支票到銀行，切勿在櫃位存入，因為，所有銀行皆有指令，凡見這類「水魚」，職員一定要游說佢「投資」，買入各式「金融產品」。所以，靚仔靚女經理有責任鼓其三寸不爛之舌，提供貼身服務，自薦做你顧問，游說閣下作「精明投資」。

　　為避免退休員工心軟踩氹，CEO忠告－－入支票，用銀行Drop Box，靜靜放入支票箱，以免被引或迫入「水魚籠」！巨款過戶後，才冷靜諗諗如何運用。「退休棺材本」，萬萬不可輕率！