上次一篇《你想退休?憑乜?》引起了不少迴響，尤其飽經滄桑及志於世故者，必會心微笑，因為今天已很少人會勸年青人，點解？嘻嘻，慳番啖氣暖吓肚好過。反之，你有慧根，很快就開竅──Life Itself will Let You Know。

　　冇慧根？對唔住，你成年喇，不能再博同情，以為日怨夜怨世界跟你意願變，儍咗？

　　記住，亂投資，一定不會令你提早退休，因投資場內大鱷如麻。投資與利潤，並沒有等號。大多數時候，要重重交學費，先做大鱷點心，慢慢再由血的教訓中練功。

　　我的投資路一樣，經歷廿年苦難，並且，曾出任倫敦金經紀（接近騙人一種！），所以，對投資場內蠱惑招數，相當精通。之後，你想呃我，哈哈哈，冇咁易，唔該死開！

　　股市中最多志大才疏好高鶩遠之輩，非常膚淺，人云亦云，例如深信「高風險高回報」（其實，多是高風險冇回報，甚至，高風險負回報！）；「賭得大贏得大」（我只肯定賭得大輸得大）；「止賺止蝕」（買啱一穩陣增長股例如中華煤氣(00003)，為何要止賺？她不停生仔　不停有收益呀，傻的嗎？若買錯一隻股，則真真走得快好世界，愈快Cut Loss愈好，還等乜乜價位出現才止蝕，又是傻的嗎？）

　　簡單邏輯，不少「股蟻」以為炒股炒樓真的可以致富。若如是，為何仍有那麼多經紀日捱夜捱，忍受惡客面色，只為求少少佣金？

　　說穿了，投資市場，尤其股票市場，入一個發春秋大夢場，一個賭場，絕大部分參與者只蝕不賺，愈貪愈蝕，愈冇知識愈蝕，愈懶做功課愈蝕，愈想賺快錢愈蝕，愈以為容易賺夠可以退休愈蝕……

　　其實，想快點退休，打工仔，只有一個途徑，做好本業，不斷增值，最最最最最重要，有職業道德及良好工作態度。

　　以上似乎是「阿媽係女人」道理。但就我作領袖及管理生涯中，發覺十位打工仔，有八位職業道德及工作態度根本未合符標準。終於，優勝劣敗，只有兩位可以升至高位，再經多年奮鬥，退休生活自有保證，就如此簡單。冇符碌，冇捷徑。靠炒股能安穩退休？三個字，傻的嗎？