14/02/2024
2月28日之後才買樓
在農曆新年期間,有不少國內老友嚟香港拜年,順便睇吓學校睇吓樓。不少老友都打算將小朋友送嚟香港讀中學,日後去外國甚至回國升學都比較方便,買一層樓亦順理成章。不過,一切都等2月28日之後,因為當日財爺恭讀《財政預算案》,有很大機會撤銷辣招,即是非香港人買樓不用付15%特別印花稅。
大家又千祈唔好以為如果財爺唔撤辣,內地人是不會買樓,我認為是有影響,但不至於不會買樓。因為大家都估計,無論是否撤辣,香港政府決定之後,起碼有三、五年不會改變,如果撤辣,買樓的內地人就會多些,唔撤就會少一些。不過唔撤辣,樓價繼續下跌,地產商又唔買地,政府很難解決巨額財赤問題。當然,即使撤辣,樓市亦不會立刻掉頭升,只是會多了人睇樓買樓,繼續下跌的機會就會減少。總之,撤辣就好似如箭在弦,不得不發。
月尾公布的《財政預算案》會否撤辣,備受準買家關注。(2024-25年度財政預算案fb圖片)
即使政府撤辣,甚至將正常買樓印花稅減半,但如果銀行唔借錢畀人買樓,撤辣都是徒勞無功。去年樓價下跌的其中一個原因,就是很難問銀行借錢買樓,而銀行反而向按揭借貸比率不足五成的客戶追收差額,令到供應增加,需求減少,樓價點會唔跌?好彩最近銀行估價稍為回升,銀行不再以估價下跌為理由向客戶追收差額,業主可以鬆一口氣,樓市亦會鬆一口氣。
其實除了內地人之外,亦有不少香港人等《財政預算案》公布後才買樓,因為如果唔撤辣,他們仍然可以慢慢揀,慢慢鋤價;如果撤辣,就會加快買樓腳步,否則,有機會唔夠現在要畀特別印花稅的人爭。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
WoW WoW星期三:健康網購產品低至$99!(只限今天)► 火速行動