08/02/2018
【補眠大計】返工好眼瞓點算好?最多人匿喺廁所補眠?
最近,德國工人成功爭取將每周工時縮減至二十八小時,實在令唔少香港打工仔非常羨慕!但學阿源話齋,「這些機會不是屬於我的。」小編唯有叠埋心水,學返幾招辦公室補眠大法啦!
1. 匿喺廁所補眠
相信大家都一定有試過匿喺廁所呑卜或瞓覺,明明五分鐘可以去完個廁所,偏偏十幾廿分鐘都未出嚟!而網上論區亦時不時有網民投訴,話公司有個同事一天去成十次以上廁所,每次十五分鐘左右。所以小編都要喺度奉勸大家一句,補眠還補眠,記得都要照顧下其他有(同樣)需要嘅同事呀!
2. 唔出街食lunch
Lunch time係打工仔攞正牌休息嘅時間,尤其食完lunch後飯氣攻心,寧舍想眠一眠!喺呢個時候,無嘢再可以阻擋到打工仔補眠嘅衝勁,直至腦細行埋嚟自己個位……
3. 留意腦細嘅開會時間
唔想偷偷摸摸咁補眠?小編仲有一個方法──就係留意腦細嘅開會時間!有時高層開會閒閒哋都要一兩個鐘頭,只要留意返佢哋嘅開會時間係咪定期同穩定,咁補個長少少嘅眠都冇怕啦!不過前提係,你要有一個唔會督你出嚟兼幫你睇水嘅同事!
如果大家咁唔好彩,全日都搵唔到任何時間同空間嚟補眠,咁就唯有頂硬上捱到收工!而小編早有先見之明,一早搵定註冊中醫師林婉珺學定3招可以提神醒腦嘅穴位按摩!即睇:【穴按愈健康】捱完通宵好眼瞓?提神醒腦3招搞掂!
【香港好去處】etnet全新頻道盛大推出!全港最齊盛事活動資訊盡在掌握!► 即睇