新年前後又係出annual review嘅旺季，以前annual review係傾升職加薪，但今年就變成傾裁員、凍薪、減薪。以前annual review時會問老細「點解升佢唔升我？」，但今年就變成問「點解炒我唔炒佢？」。據非正式統計，去年好多公司裁員約10%，而仲保得住份工嘅打工仔中，約60-70%今年凍薪或者加薪1%。當然升職／裁員時都涉及好多不同因素，但其實公司要升一個人／裁員時，都會睇員工嘅價值。價值唔單只係該員工嘅人工，亦包括佢為公司帶嚟乜嘢。價值往往都係一個比較，如果你能夠懂得如何differentiate自己，可能只係回答老細嘅一個提問，或者係交嘅一份簡單report，已經可以高下立見。

　　今日係Toby喺呢間公司工作嘅第5次annual review，過去4次review佢都抱有升職嘅期望，但可惜次次都失望而回，今次亦唔例外。失望多年，Toby怒氣沖沖向老闆問個究竟。老闆隨即攞出2份分別由Toby同另一位AM Sammy所交嘅report，打開其中一頁作對比。

　　「今次campaign有5,000多個social engagement，宣傳成功為餐廳booking帶來61%升幅。」呢個係Toby嘅版本。

　　「今次campaign有5,000多個social engagement，即日為餐廳帶來80個額外嘅網上預約，對比去年上升 61%。當中5個預約為一人枱，63個為情侶，12個為四人家庭，預計將會帶來$30,000 -$45,000生意。」呢個係Sammy嘅版本。

　　大部分打工仔都習慣做公式嘅report，一來唔洗諗，二來跟前人步伐永遠係最安全不過。初出茅廬嘅你，你未必知如何「做得到」；到你成為公司中層員工時，你可以「做得到」，但未必「做得好」；而去到成為old seafood嘅你，可以「做得到」亦「做得好」，但只係你未必想去做，到最後只會為做而做，卻忘記咗report本身嘅價值。所有report都只有數據，但冇分析同insight，即只講「過去」，唔談「未來」，冇insight嘅report亦只係一個冇特別價值嘅「記錄」。

　　其實一份少少嘅report，已經可以喺老細心目中定下一個乜嘢嘅印象。每間公司都有好多員工一直做公式工作，但喺公司／上司嘅角度看，佢哋就只係一位「公式員工」。佢哋只能為公司「保值」，而唔能夠為公司「增值」。

　　巿場也好，生意也好，所有嘢都講價值，你先要有價值，才可以同人談「價值」。否則公式report，公式辦工，只會帶來公式嘅人工。