上次談論疫情短線兩個較值得注意嘅時間點，有朋友問：「咁係咪代表好快會好起來？定係其實有好多公司未到去6、7月已經要倒閉？ 」經常建議大家以悲觀視點出發，習慣為最壞嘅情況作打算，再計劃好所有嘅準備方案，警惕自己要不停地提升自身防守能力。

　　現時巿場上面對兩大問題，一：多數巿民怕危險而唔願意／減少上街；二：面臨裁員／減薪等不景氣因素，巿民嘅消費慾下降，減少用錢以增加後備金。而面對疫情，好多公司除咗開源節流外，大多會將生意轉做網購。但其實網購時代已經開始咗好一段時間，不過因為香港地方細交通方便，令網購發展比較慢，再加上部分行業較難轉做網上生意，需要更多時間調整，所以如果公司唔能夠快速而成功地轉做網上生意的話，問題都係冇解決。

　　另一邊廂，大／有實力嘅公司，因為佢哋夠「厚底」，除咗以上策略之外，或多或少都會有「鬥長命」心態，希望捱過疫情後，汰弱留強，從而令佢哋嘅巿佔率變大，再從拾軌道。但事實係疫情時間長／短冇人可以估計到，所以玩耐力賽對大家嚟講多數都係蝕底，中小企更甚，除非你係水喉十分充足嘅公司，否則不太建議一齊鬥長命。所以有中小企就會轉向諗，係咪時候需要瘦薪、裁員，更甚係倒閉。

　　先排除感性因素，如公司／老細同員工關係、社會責任等等嘅問題，只從理性嘅生意、數字角度分析。有時並非你想倒閉，而係其他公司令你倒閉。可能你公司喺疫情期間仲頂得住，仲能夠繼續賺錢，但有一個隱藏嘅危機，就係上／下游公司嘅業務受疫情影響，令佢哋嘅營運風險提升，繼而令你公司營運風險都相對提升。例如餐飲業，雖然你轉咗做外賣生意，還可以頂得住，但食材供應商（上游）因為國家封關、減少航運等等而令來貨不足／唔穩定，支持唔到正常運作。又或者係你做分銷／B2B生意，但下游接貨嘅公司都自身難保，冇能力接你嘅貨，令你收入大減，不停積聚死貨，到頭來自己變得兩頭唔到岸。

　　從商業角度看，以前時勢動蕩，結業再拿回現金，再將現金換其他有用資產／工具避險係最好嘅方法，因為現金／現金流就是王。但今次呢一疫，各國會不停印銀紙，令現金不停貶值，所以拿回現金都未必係最好，轉型可能先係中小企老闆嘅出路。

　　當然唔係鼓勵公司閉門大吉、減薪或者裁員，只希望大家可以從老闆、打工仔、自僱人士嘅角度去睇，更了解自己／公司嘅情況，及早計劃合適公司／自己嘅轉型方法。（待續）