中學、大學少不免有 group presentation。細個 present 經驗少，一企喺一大班同學老師面前，總係緊張到口震手震，揦埋口面。到而家人在職場，一 team 人喺上司、老細、客戶面前 present，雖然多咗一份老練，但都總有一個嘅疑惑，就係其他組員 present 緊嘅時候，你喺台上應該做咩呢？面部表情又應該點控制？

　　呢幾個星期，政府開咗幾個記者招待會，且看呢一班月薪幾十萬嘅香港精英點樣處理以上問題，亦讓我哋可以好好參考學習。

　　佢係雙目最有神嘅一位，一雙精靈嘅眼睛不斷四圍望，顯示佢若有所思，可能係溫習緊一早準備好嘅 model answer。佢眼睛雖然四圍望，但佢個頭從來唔郁，亦無向講者點頭表示認同。企喺第一排，畀人擺喺最前線，感覺有啲理虧，所以緊張同口窒亦算正常。

　　呢位同事雖然企喺最後排，一個佢以為無人會留意到嘅地方，但佢嘅表情往往可以令佢發出光芒，成為眾人焦點。半開合嘅眼睛，嬲咗成村人嘅模樣令人懷疑佢係咪被迫企出嚟，所以以臭臉作回應。

　　睇直播時真心覺得佢係一塊紙版公仔。換過三位唔同 presenter，但佢每一分每一秒都維持住同一表情，同一個放空嘅眼神。呢種極至專業嘅定格表現應該可以令佢成為街頭表演藝人，做雕像。

　　一貫憂鬱但無焦點嘅眼神，帶畀台下觀眾陣陣寒意。目無表情、灰頭土臉更令人覺得佢缺乏睡眠。正面啲睇可以話佢為呢場 present 廢寢忘餐，但上得台就唔可以怯，擠出一個令人咁 unpleasant 嘅面口，就算你講話好精闢（雖然佢做唔到）都會大打折扣。

　　有啲會議會開好耐，所以保留體力，懂得留放非常重要。開始會議時企得四四正正，會議中段時就歪歪斜斜，左搖右擺，觀眾其實擔心你仲多過留心 presenter。

　　靠邊站不代表你唔重要，相反更考你功夫，因為你離開 presenter 最遠，接收指示嘅距離亦係最長，所以你更要留心整場會議嘅一舉一動。如果一個靠邊站嘅同事都表現得非常投入，聽得津津有味，經常點頭示好，亦表示團隊士氣較好。眈天望地，老細望左，你望右，可能你更有潛質做 body guard。

　　早前一名警員嘅一句說話說出了重點：「We are not background ar!」的確，一眾企喺後面嘅同事唔應該只係背景版，而應該顯示出專注、顯示對講者嘅支持。就算你無份 present，你都要做好喺背後支持嘅角色。臨時演員都係演員，上得台，你就係焦點。

　　從呢幾場記招，我發覺原來我哋平時喺公司做 present，原來一啲都唔失禮。

image source: