07/03/2019
【有效的營銷】一個APP的背後,隱藏著龐大的消費數據+產品銷售策略!
近年好多公司都開始為自己公司研發Chatbot同其他offline嘅Kiosk,首要目的除咗係做customer service,讓顧客有最即時同智能嘅購物體驗,其次就係想收集不同數據並加以分析,再運用於其他生意/情況之上。因為暫時仍未到成熟嘅階段,所以好多公司都未能有策略地收集數據,而大多數嘅處理手法都係「有咁多、攞咁多」,收集後亦未能好好運用。其實收集得到嘅資料,點先叫做用得其所呢?早前CocaCola日本就推出咗新手機APP,雖然對消費者而言,佢只係一個簡單嘅「玩遊戲、換獎品」APP,但實際上背後有重大意義。
手機APP運作好簡單,先下載手機應用程式,於日本不同地方嘅汽水售賣機購買可口可樂產品時,再將手機連上售賣機,購買後會獲得印花,集齊不同地區指定數量嘅印花,就可以獲得免費飲品。由於日本人習慣使用自動售賣機,估計日本大約有500萬部自動售賣機,以密度計為世界第一。雖然是次活動並非所有售賣機都適用,但潛力亦十分厲害。
同類嘅活動能收集到嘅數據主要分兩大類,第一類係「Product & Service Oriented」,與公司產品/服務相關嘅資料,例如邊類產品較多人查詢/購買、顧客使用/購買時會遇到乜嘢問題等。第二類係「Customer Oriented」,與消費者相關嘅資料,例如佢哋嘅消費模式、家庭/工作背景等。有策略地收集,之後再將其串連起來,除咗可以改善產品嘅銷量之外,亦可以輔助公司其他生意,甚至推出新產品/服務。
雖然大多數人會將是次活動嘅著眼點放於增加產品銷售量,但其實APP同售賣機所收集得來嘅數據,遠比賣產品帶來嘅盈利更為重要。第一個最直接影響到嘅事情,就係產品銷售策略。今次活動嘅數據能了解不同地點對不同飲品嘅需求,數量、口味、購買習慣等,繼而能有效地控制物流、減低成本,亦能增加或放棄銷售點。
另一方面,一般購買汽水呢類fast moving product,都較難收集消費者購買嘅時間同習慣,多數只知消費者購買原因係「by occasion」如午餐/晚餐/派對/節日等,但確實時間就較難掌握,但今次活動就能幫助解決部分問題。消費者喺購買產品前嘅一段時間,係消費者最易受影響嘅時段,亦係推出廣告嘅黃金時間,合適嘅廣告能左右佢哋消費決定,呢類嘅資料能夠有效改善廣告嘅影響力。
Online同Offline 呢一條線已經愈來愈模糊,要有一個更有效嘅營銷策略就要將兩者緊地結合,不論係O2O嘅營銷機制同銷售渠道,還是係數據分析等,已經不能再單獨進行。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情