又到打邊爐季節。邊爐年年都打，唔知你又有無留意自己打邊爐嘅習慣？嘗試回想，睇下你又有無以下打邊爐 20、30、40 嘅階段。

20.

　　身處中學、大學時期，同同學朋友打邊爐，首選$148「任叫任食」、汽水啤酒任飲嘅酒樓。由於呢段時期做 part time、補習搵得唔多，兩個鐘嘅「放題」同一大班人開懷大吃大喝，叫到成枱肥牛、墨丸、蟹柳。嗰時你彷彿擁有咩都放入口嘅勇氣，咩壞膽固醇、血脂、尿酸對嗰時嘅你嚟講，簡直係外星文字。

30.

　　到出嚟做嘢，有穩定收入，你開始四圍發掘精品火鍋。精品火鍋有別於一般火鍋店，食材比較精緻、刁鑽，而每碟嘅份量亦比較少。相比以前追求份量，呢段時期更追求質素。你同幾個朋友更會四圍發掘隱世火鍋店 —— 特登去深井試下牛白肉、挽手腩，去慈雲山食個即炸響鈴。無論有幾吊腳，呢個時期嘅你都願意乖乖付出時間同金錢。除咗滿足口腹之慾，事後四圍同人分享「我食過」、「我試過」更令你有滿足感。嗰時亦可能係你第一次畀五百幾六百蚊打一次邊爐。

40.

　　到呢個階段你更經常去大埔、將軍澳、元朗等幾個要好朋友嘅屋企打邊爐。人漸漸長大，一眾朋友陸續成家立室，有小朋友嘅家庭更係深居簡出。買料上朋友屋企打邊爐就成為大家嘅 preference。相比以前捨得洗錢出去打邊爐，你會覺得喺餐廳打邊爐「唔抵」。「唔抵」並唔係因為你畀唔起，而係你覺得錢可以用喺一啲更值得嘅地方上。而喺你嘅朋友圈之中，總會有人識得喺街市買到靚牛肉，大家分工合作，佢買飲品、你負責買菜。三五知己喺一個四百尺單位吃吃喝喝、有講有笑，絕對係忘記辦公室煩惱嘅良方。

20 歲嘅你追求快感；

30 歲嘅你講求質素；

40 歲嘅你懂得珍惜身邊人。

　　由食雞子到食牛白肉，再到而家多菜少肉；由街外打到返屋企，再由廿幾歲打四十幾歲，打邊爐話畀我知，你同我都不知不覺地轉變。每一個冬天過去，大家都不知不覺地成長。

　　好好珍惜由細同你打邊爐打到大嘅中學同學，約下嗰個舊時好照顧你嘅舊同事。涼涼哋，用打邊爐做藉口，互相 update 一下，順便畀佢提點一下你過去一年有咩轉變。