上星期朋友問及，較早前佢搵咗間SEO公司幫手推搜尋排名，但幾日後佢公司網頁突然間喺搜尋引擎嘅結果中消失，其實呢個極有可能係用咗「黑帽SEO」嘅後果。

　　做Marketing其中一個最想用到嘅工具必然係SEO（Search Engine Optimizatio／搜尋引擎優化），意思係用方法令自己嘅網頁喺搜尋引擎中取得較佳嘅排名。方法主要喺網頁內或外進行「加工」，令搜尋引擎對你網頁嘅評分提升，喺眾多競爭對手中脫穎而出。一啲較大嘅公司佢哋會有自己一小team專門處理SEO／SEM嘅工作，而中小企多數會外判畀廣告公司處理。坊間對SEO嘅「加工」工作主要分「白帽（White Hat）」同「黑帽（Black Hat）」兩大類。

白帽（White Hat）

　　白帽指用正規嘅方法去提升自己網頁嘅評分同排名，方法例如： 

　　優化網頁嘅結構、網址名稱以及每個file名稱，令搜尋引擎更易了解你嘅網頁；從網頁內容著手，自家製作一啲同你公司相關而有用嘅高質內容，增加關鍵字同時亦豐富內容上嘅結構；可以從外部連結著手，以其他網頁嘅連結增加自己網頁喺搜尋引擎上嘅知名度；

　　白帽嘅方法其實仲有好多種，如果全部都做嘅話工程亦唔細。而部分嘅工序係有關結構上嘅改動，所以好多時會喺寫網頁嘅初期已經著手加工，而其他則會喺網頁完工後先會開始。白帽需要做嘅功夫相對比黑帽為多，亦需要一定時間先見成效，係一個長線嘅工作，但佢嘅持續性同安全性就比較為高。

黑帽（Black Hat）

　　有安全嘅方法，即係有唔安全嘅方法，呢個就係黑帽。黑帽主要係針對搜尋引擎漏洞嘅方法，欺騙搜尋引擎令自己網頁得到較高評分，例如：

　　將海量嘅關鍵字隱藏喺背景之中，誤導搜尋引擎以為有好多關鍵字出現；將他人網站嘅文章完完全全地抄過來，製造出「內容豐富」嘅錯覺；製造好多假入口／假連結；

　　黑帽嘅加工方法主要喺網頁完工後先會開始，所以有啲公司如果前期冇為網頁做白帽嘅功夫，但又想喺短時間內達到成效的話，多數會採用黑帽。講得係唔安全，即係有後果，因為呢啲方法都被視為欺騙搜尋引擎嘅手法，所以一旦搜尋引擎發現你出古惑，佢哋會對你嘅網頁作出懲罰，暫時或永遠將你從搜尋結果中移除，2006年BMW亦試過被Google短暫地從搜尋結果中剔除，因而損失生意。

　　因為黑帽嘅成本相對地低，而且較快有成效，所以總會有人挺而走險。但如果可以的話，建議盡量避開用黑帽。SEO係一個長遠而有用嘅工具，與其貪一時方便而冒險被剔除，不如為此投資多少少，為公司網頁建立一個長線而壯健嘅地基。