朋友都追問團年開工日子，所以樓下唱緊聖詩，我就翻緊通勝，感覺有啲surreal。

還神、大掃除

　　以下日子，新曆用阿拉伯字，舊曆用方塊字。

　　1月31日，舊曆十二月十五，星期三，最啱！

　　次選2月1日，舊曆十二月十六，星期四，都掂。

團年

　　2月12日，年廿七，星期一，包無閃失。

　　年廿八、廿九、三十都唔理想，雖然通勝話宜會友，但與丁酉年用神唔夾，不過現代人講方便，你自己諗啦。

開工

　　開工日子就馬虎不得咧，事關全年興衰。你業績驕人，定係勞氣食塵，都與開局有關。

　　明年春節假期後嘅上班日係年初五，有異於以往開工日多數喺玄學上唔make sense，今次竟然bingo到好日！

　　時辰方面，要攞盡優勢，用辰時，即早上7:30-9:00，你可以8:45趕到，做齊以下動作：

　　一﹒用黃色新毛巾濕水，抹寫字枱同門框。

　　二﹒開電腦，傳「開工大吉」電郵畀重要客戶同工作夥伴。

　　三﹒派開工利是。

　　四﹒做生意嘅，一早搵定人幫襯，開工吉日吉時先落單。

　　五﹒做零售嘅，搵熟客戶吉時嚟光顧，開吓收銀機。

　　點解要勞動D員工九時前轆番嚟呢？因為戊戌年立春八字地支有寅水卯木，用辰時，寅卯辰會木局，明年用木火，木生火，大吉。

　　如果你唔想年初五番，要歎多陣，千祈唔好揀年初六，係破日。年初七都唔好，宜用年初八丙戌日，一於hea得徹底D！初八可用午時（11:30-1pm）或未時（1:30-3pm），你仲想任性D，可以初九施施然番工，都係11:30-3pm。

　　不過明年跟大隊有著數，初五癸未日開工，此日與戊戌年有極佳「化學作用」，戊癸化火，財來就我，應該有豐盛成果！