03/11/2016
【2017年預測】女人容易上位 男人要識走位
2017丁酉年太陰星化祿,粒星發光,女性發圍,男人亦可借勢發力。
太陰星即月亮,亦指女性。
太陰化祿,即女性當旺,那麼明年哪些女性特別旺呢?
答案係靚女人、叻女人(註)。
好多人都唔知自己乜星坐命,因為未起過紫微斗數盤。在冇盤情況下,要猜度自己是否屬太陰星,可作以下考量:
一. 太陰坐命的女性,一般而言漂亮聰明,就算不是很標緻,也散發著女人味,魅力非凡,比起貪狼星,後者較霎眼嬌,而太陰星則耐看點、含蓄點。
二. 太陰星愛穿貼身衣服,唔係最舒服唔緊要、最緊要靚!娉婷、婀娜、卓有豐姿。
三. 通常較溫柔,善解人意,肯定唔係男人婆,亦唔會爆粗,更唔會講「扑嘢」。
如果你係太陰坐命,明年太陰化祿,就會開正你條水,會財運亨通、謀事順利。(當然,若此星遇煞星或落陷,以上優勢會打折扣或消失。)
擴大至其他女性而言,明年都較容易上位、當權、一展抱負。今年已有蔡英文、文翠珊當選,看來希拉莉大有可能成為美國第一位女總統。那麼香港下一站、明年特首之戰,會出個天后嗎?
女人順風順水,男人又可以點樣借勢呢?
一. 講開特首,相信明年啲老婆會坐正做家中特首,老公適宜順水順舟,無謂硬撼,皆因太陰化祿必逄巨門化忌,後者應驗在明顯廝殺、或暗中冷戰,即明年夫妻有乜兩句,大家容易水火不容,不過結果都係女嘅贏多,咁何必嘥氣呢?
二. 明年男人可注意如何借用女人助力,舉凡女客戶、女同事、女同行、女上司、女下屬……等都可能成就你。If you get on their good side,一定有so。
明年緊記:好男不與女鬥,因為鬥唔過。對女人好啲,肯定有運行。
註:明年是月亮代表好多金的年份,最利本命已太陰化祿、或命宮太陰廟旺的人,例如夜生人,指申酉戌亥子丑六個時辰(即下午三時至清晨三時)誕生的人;或上弦(初一至十五)出生者,上弦月亮由新月變滿月,有漸趨圓滿的吉兆。這些人多是美貌與智慧兼備,而且醒目得嚟好細緻,不會張揚,明年巨門化忌,邊個揚死邊個,太陰星最堪撈,可以悶聲發吓財!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情