一周之內發生了一連串床頭(不是床上)的事件。

　　受害人有三個。

　　被誰害呢?

　　被自己害，皆因唔知掟、怕麻煩、貪方便、或玩有型!

　　一位有型髮型師，甫見面即問我:

　　「今年老鼠仔點呀?」

　　「老鼠呀，馬年有事噃。」

　　「冇呀，舊年幾好呀。」

　　「子午沖，勁沖噃，冇理由冇事嘅。身體點呀?零病零傷呀?」

　　「哦，係咧!年尾傷咗手，打波整親，捱咗兩個月。好在係左手，如果係右手，就大大鑊咧，仲碰啱聖誕新年春節嘅生意高峰，洗、染、燙、剪，閒閒地佔全年業績三四成，真係好驚嚇!又好唔方便!」

　　心中正在暗忖:又話冇事，玩我咩?然後我突想起一件事情，便問他:

　　「你張床係咪冇床頭?」

　　「係呀!」

　　「點解冇!」

　　「我加咗個墊喺床頭，以為可以挨喺度睇電視，點知唔舒服，索性拆咗成個床頭囉。」

　　「冇床頭就易傷手腳，尤其是手!」

　　我為甚麼會靈機一觸問他呢，事緣數天前陪風水高人去朋友家。高人一見張床，即皺起眉頭問:

　　「點解冇床頭?」

　　「租嗰陣時連埋呢張床，咪就咁囉。」

　　「一定傷手。」

　　「哎吔!係呀!我學咗一年詠春，上個月就整親隻手喇!」

　　幾日後，一位平面設計師來探我。

　　「我氣色點呀?」他問。

 　　「轉工唔駛諗咧!雖然事業宮陰雲密布，但又唔死得，你繼續捱啦。　」

　　他跟著大吐苦水，訴說老細如何篤他背脊，有功就領，有鑊就卸，近日鬧爆佢，所以佢想走。

　　「你張床有冇床頭?」

　　「冇。有影響咩?」

　　我唔答佢，繼續問:

　　「有冇傷手?」

　　「唔知點解，由膊頭至手指尾都痛。」

　　「即刻換番張有床頭嘅床啦。」

　　「哎吔!張床好cutie架，長長方方，好似舊方包，喺間房中央，我覺得自己好自由自在。」

　　「床冇床頭，即係冇靠山，上司唔照，小人唔走，你可以好自由咁奮鬥，唔駛諗有人幫咧!」

　　職場已經驚濤駭浪，睡張冇床頭嘅床，唔係自由，係自殺!