07/02/2024
美斯Missing!美斯無上場應該向誰問責?球王、跨國大企業、政府?管理者束手無策、球迷回水無望?咁係因為你太悲觀!
張慧敏 Alison
張慧敏 Alison
張慧敏Alison(Son姐)
職場女王身世
橫跨幾世代,馳騁幾十年
一雙慧眼,見證職場盛衰
戎馬一生,經歷大小戰役
辣筆寸嘴,有的放矢,百無禁忌
清心直說,如有雷同,不是巧合YouTube:張慧敏Son姐話
Facebook:職場慧眼 – 張慧敏Son姐
職場女王
逢周三更新
年近歲晚,雖然整個香港完全沒有過年氣氛,不過一樣鬧得熱哄哄,真的要多謝香港政府全力支持私人籌辦的國際足球盛事!這個國際邁亞密球隊有幾勁,班主是萬人迷碧咸,球王美斯、蘇亞雷斯,粒粒巨星,本來已經足夠令香港人興奮。只不過入場睇波門券非常昂貴。起初星斗窮鬼市民以為入不了核心內圍,核心外圍遠觀吶喊都叫做有份參與呀!實在太睇小我們的政府的把關能力了!沒有門卷的大眾,何止核心外圍入不了,成個區都入不了!那麼機場接機離遠影幾張相留念總可以了吧?接機儀式改在停機坪,OH!疊埋心水死心罷了!
這場只有4萬幾觀眾的球賽,竟然可以令整個香港沸騰起來了,究竟發生了甚麼事?美斯面口由步出機艙一刻開始未曾好睇過,主辦單位安排的所謂熱身訓練,球王hea到一個點表面功夫都費事做。都話香港人天真熱情,聽人講話球王會踢45分鐘就Keep住個熱情一路等,比賽當日全套行街look上陣,坐在一旁木口木面有花生都費事食,已經表明沒有打算落場。下半場一開始見到球王繼續坐、衫褲鞋襪都冇換又冇熱身,依然一直懷著盼望等到臨完場才起哄叫回水,真係唔話得!
事到如今要問責,究竟問邊個責?堂堂跨國大企業CEO紓尊降貴開記者招待會交代,大人物喎,出場唔係唔使你哋等啩?全程照稿讀不回答問題,公關變關公災難?CEO黑口黑面高高在上擺到明關公上身,大家唔係睇唔到呀嘛?明明可以發新聞稿通知,偏要搞場記招,這位CEO凝聚香港,全個香港一齊問候佢,真犀利!
至於美斯沒有落場踢,令所有香港人失望,究竟關邊個事?我會說肯定關合約條款事!足球是運動來的,運動員很容易受傷的,合約寫明又如何,意外是無法預計的,不要忘記球員周身傷患舊患,不能踢就是不能踢了,復原了當然就可以踢了,不過需要多少時間才能復原只有天知曉了!
球王美斯的態度,我相信內裏一定有文章,不過即使和主辦單位出了任何拗撬問題,無論如何面對特登入場支持打氣、滿場10號波衫的支持者,最基本的風度修養禮貌都必須要有。
主辦單位和球隊簽的合約條款內容細則,基於保密條款,主辦單位一定不會公開,但是作為全力贊助的香港政府究竟知不知?由落機到嚟港當中牽涉的資源,絕對不只是警力,千6萬funding算甚麼?動用全香港之力幫一間私營機構賺大錢,公開講句唔要資助就過骨,政府束手無策,市民回水無方,可以點?咁係因為你悲觀,今次事件引起全球關注討論,何止國際化,仲好繽紛添呀!學嘢啦,香港人!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情