09/08/2023
職場女王Son姐 | 小薯大呻被Old Seafood欺凌!實情是自己混淆是非曲直、錯判形勢兼唔識保護自己?
張慧敏 Alison
張慧敏 Alison
張慧敏Alison(Son姐)
職場女王身世
橫跨幾世代,馳騁幾十年
一雙慧眼,見證職場盛衰
戎馬一生,經歷大小戰役
辣筆寸嘴,有的放矢,百無禁忌
清心直說,如有雷同,不是巧合YouTube:張慧敏Son姐話
Facebook:職場慧眼 – 張慧敏Son姐
職場女王
逢周三更新
剛畢業初出茅廬,未知道自己興趣的小薯仔,決定搵份part-time做住先,是非常正確的決定。最近決定唔做,原因是被Old Seafood欺凌,究竟點樣被欺凌?
話說公司制度,只有full-time孭數,part-time不需要,一返工小薯仔就被要求有客戶簽單的話,全部要入那唯一的full-time數。初初小薯仔覺得反正自己冇Target冇所謂,但做落之後就出問題。那位full time日日返工懶懶閒,疊埋心水等part-time做完全部入自己數。小薯仔唔忿氣向店舖主管反映,主管的反應是,更加闊佬懶理,Full-time繼續肆無忌憚!最終因為一次full-time放假,小薯仔簽單用自己的名義簽,full-time發現之後發爛渣責罵小薯仔點解唔跟規矩用full-time個名簽?小薯仔被駡個狗血淋頭,頂唔順決定辭職,原因是full-time態度惡劣!繼而寫了一封投訴信給人事部投訴被惡劣對待。
小薯仔被欺凌是事實,但整件事和Old Seafood完全無關,是被這間公司習非成是,上有政策下有對策的欺凌。小薯仔一返工一開始覺得沒有的問題,自己做的單全部入full-time數,偏偏正正就是問題的最大核心所在!為甚麼店舖只得一個full-time?因為多一個就要孭多一個full-time的數!點解請part-time?Part-time是請來幫full time跑數填數的!管理層只會睇數據,只要店舖到數,大家過骨就得啦!
其實當日小薯仔搵工有得揀做full-time或者part-time,因為full time有sales target part-time冇,不想要有孭數的壓力小薯仔決定做part-time。以為唔使孭,結果孭全舖,被利用剝削到體無完膚。不過沒有經歷,何來經驗?經一事長一智,最怕是經了事,依然未有長智,混淆是非曲直錯判形勢,捉錯弄神嬲錯人,連保護自己都唔識。
一步錯,步步錯,其實那間店舖的行為是集體詐騙,利用公司的漏洞;題外話,大家相不相信公司管理層不知道有這個漏洞的存在?那位full-time明明放假不在場,員工邊日返工邊日放假,公司是有記錄的,小薯仔要是把單簽在他的名下的話,一樣是詐騙,是刑事罪行來的!
至於決定唔做之後寫信去人事部投訴,跌落地揦返拃沙,是純粹自我感覺良好的行為。我說會有作用,大家信不信?明明那些要求不單止不合理,根本不合法,還要被侮辱羞辱,都不敢反問反駁,不夠膽捍衛自己,日後如何在職場生存?
不是所有飯都啃得落的,嗟來之食,不食也罷!待人接物恭敬有禮,是必須的。做事無需要斤斤計較,但是非黑白要看得清,分得清。道理是這樣講的,但怎樣做如何處理的技巧,有排學。可以肯定的是小薯仔今次的經歷,識得學好好學,真正受用無窮。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票