17/05/2023
職場女王Son姐|點解要返工?老闆、員工互相不滿離不開2個原因!多勞多得肯定唔work?
張慧敏 Alison
張慧敏 Alison
張慧敏Alison(Son姐)
職場女王身世
橫跨幾世代,馳騁幾十年
一雙慧眼,見證職場盛衰
戎馬一生,經歷大小戰役
辣筆寸嘴,有的放矢,百無禁忌
清心直說,如有雷同,不是巧合YouTube:張慧敏Son姐話
Facebook:職場慧眼 – 張慧敏Son姐
職場女王
逢周三更新
有一個問題我一直想問,究竟點解要工作?如果工作的目的就是為了生活的話,那麼只要勞資雙方協議好做甚麼工作換幾多報酬,理論上各得其所,只要公司準時出糧,勞資雙方沒有甚麼好投訴埋怨。但事實並非如此,是埋怨投訴爭拗糾紛不斷,對立的情況矛盾日益白熱化,點解?點算?學馬雲話齋,員工不滿講到底2個原因「錢,沒給到位;心,委屈了」。老闆不滿的原因同樣2個只是角度不同「錢,給多了;氣,不順了」。人工幾多才算合理,甚麼技能價值幾多,勞資雙方各有各的期望計算怎麼辦?
以前工業時代,人工計算直接簡單,就是計工時多勞多得。時代不知轉了幾多轉的今日,計算人工的方法並沒有與時並進,想像力創造力解決問題的能力應該如何定價?體力勞動計工時,腦力勞動點計數?硬實力硬著陸軟實力軟著陸,究竟硬好還是軟好?哪一樣比哪一樣更值錢?如何吸納新一代的人才,有甚麼辦法留住有價值的員工?我肯定知道的是沿用以前的那一套多勞多得基準,肯定唔work!
打工仔不滿人工少,為自己努力工作未等得到重視叫屈,為甚麼不是直接向人事部上司或者老闆反映用爭取?反映冇用爭取不果,疊埋心水搵工跳槽何用委屈?日夜埋怨繼續準時日日返工是甚麼玩法?做人最緊要對自己坦白,學藝未精,就努力下苦功精益求精。時機未到,就低頭蟄伏默默地靜靜地增值自己,時機一到,你才有能力把握掌握!成也委屈,敗也委屈,任由委屈拖垮沉淪,或是把委屈化成動力,成為迫自己成長最大的推動力。要進步成長,沒有人可以阻止。要頹廢沉淪,沒有人可以拯救,只有靠自己看自己。
老闆認為員工唔值咁多人工,畀通知叫佢走得,賠錢要佢即刻走仲得,豪氣!又要馬兒好,又要馬兒不吃草?Come on,搵部時光機返去舊時生活算吧啦!但係遇著Hea做員工,明明人工俾到足,但係功夫唔做足都算,還要神龍見首不見尾鍾意就返工,唔鍾意就失蹤,條氣點順?Come on老闆,今時唔同往日,有錢請人唔係大晒㗎,好多打工仔唔使做都一樣有飯開㗎!醒各位頂住條氣嘅老闆管理層SON級心法:忍無可忍,深呼吸,吸啖氣,呼啖氣,平復情緒,重新再忍,完!唔係唔知請人難係唔係?醒吓啦,接受現實啦!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情