【晴報專訊】無綫新劇《智能愛人》本周二晚於翡翠台首播，雖然新劇被安排緊接收視慘淡的《刑偵日記》推出，但視后李佳芯（Ali）瞓身演活機械人阿寶，展現超強喜劇細胞，獲粉絲大讚有突破。監製陳翹英亦大讚Ali演得出色︰「我啟發佢，之後佢再諗點演，我好滿意！」

　　李佳芯在新劇《智能愛人》中飾演新式機械人阿寶，有次被陸永飾演的古家廉意外執回家後，阿寶逐漸體驗人間的七情六慾，雙方漸生情愫。首三集所見，劇情輕鬆惹笑，化身機械人的Ali無論在語調及肢體動作皆處理精準，盡見機械人的冷漠。前晚一集中，Ali慘被豬肉佬欺騙後，要潑婦罵街式喪鬧對方，但由於機械人的設定不能爆粗，Ali發火狂「嘟」︰「我嘟你個嘟嘟嘟，夠膽呃阿姐，我嘟爆你個嘟嘟……」場面十分惹笑。

Ali在劇中換衫一幕疑似半裸上陣，衝擊女神形象。（網上截圖）

一向斯文的Ali「爆seed」狂鬧豬肉佬，令觀眾笑爆嘴。（網上截圖）

古家四口輪流「調教」機械人Ali，令它逐漸擁有人性化特質。（網上截圖）

　　另一幕中，當陸永回到家中遇到Ali在客廳換衫，他即尷尬搞爛gag︰「雖然你係智能人，但都唔好太open（開放）。」該場戲中Ali疑似上身赤裸，劇組特別以格仔遮掩其敏感部位，對這位視后來說，可謂突破性演出。此外，飾演陸永家人的蔣志光、麥美恩及盧宛茵等，演出恰如其份，可說錦上添花，很多觀眾大讚輕輕鬆鬆又一集；有網民更睇好Ali有力再爭視后，未知《智》劇能否打破近日無綫劇集收視低迷的困局。

閃現「大牛龜」非穿崩

雖然故事背景並非80、90年代，但陸永任職的公司卻驚現「大牛龜」電腦螢幕（左下角）。（網上截圖）

　　《智》劇監製陳翹英昨日大讚Ali演繹到位︰「Ali個角色好難演，頭幾集喜怒哀樂都唔可以表現出嚟，要keep住無表情，用其他方式表達情感，下星期佢逐漸由機械人變做人類，情緒會有變化！（可有教她如何演繹？）只係啟發佢，之後Ali自己再諗點演，好滿意佢嘅演出！」提到有網民質疑劇中驚現「大牛龜」電腦螢幕，演員卻用智能電話，陳翹英解釋僅屬一場誤會︰「劇集背景係不久將來，係導演構思劇中出現『大牛龜』電腦螢幕，因為科技公司老闆關楚耀係懷舊嘅人，鍾意用啲復古嘢，租用嘅辦公室都好似博物館，牆上亦有掛一啲中世紀嘅畫，絕對無穿崩！」

　　至於收視，陳翹英指劇集獲安排在奧運期間於翡翠台播出，對此未敢抱大期望︰「上星期《愛‧回家之開心速遞》都跌到14點，觀眾睇劇習慣都打亂咗，所以《智》劇頭四集收視唔穩陣，暫時唔敢有大期望，希望下星期轉九點半播放會有突破，起碼都要有20幾點！」他感謝觀眾反應正面，又指全劇長達30集，盼收視漸入佳境。