11/01/2024
Tyson Yoshi疑被偷拍感難受!IG Post相公審青年!網民唔撐:人哋係咪偷影佢就未知
Tyson Yoshi一向都「火爆」敢言,遇事唔會啞忍,之前佢曾經因為喺健身室被偷拍出post;又試過因為女友被偷拍挺身護花,唔少人都大讚佢真男人;今日佢再次因為自己被偷拍喺社交平台「洩憤」。
Tyson Yoshi今日下午時Post出一個黑底白字嘅限時動態,表示:「要影咪直接講囉,又要喺度偷拍,明顯到。」隨後佢再post出一個青年嘅大頭,對方手持電話,Tyson Yoshi為佢雙眼「打格」,相信就係Tyson Yoshi認為嘅偷拍者,Tyson Yoshi留言:「冇錯,畀人偷影係唔好受,你明啦依家?」唔少網民今次都唔撐Tyson,留言:「可能zoom最遠影後面啲嘢唔係影佢,不過就算影佢咁又點?」、「人哋係咪偷影佢就未知,佢就真係偷影人啦。」
其實Tyson Yoshi唔係第一次因為偷拍問題出聲,不過今次同上次個「層面」就完全唔同。上年4月佢於社交平台表示女友Christy被兩名男子偷拍,更報警求助,大鬧對方「死變態」。Tyson Yoshi最終指對方行為唔足以構成「窺淫罪」。警方檢查過手機後,確認這位遊客並沒有發放以上任何照片上社交媒體,只能以港鐵附例『滋擾乘客』對這位遊客作出警告。
當時有網民留言問:「原來平時見到你唔可以影你㗎?」Tyson Yoshi回覆:「佢係偷影her ass(她的屁股)。」唔少人鬧爆偷拍行為可恥,力撐Tyson Yoshi護花man爆,稱︰「好英勇呀」、「有眼不識Tyson(泰山)」、「Tyson Yoshi係真男人!抵讚」。
轉載自: 晴報
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票