《Make Money》想創業缺乏資金？天使投資、創投可能係另一出路！

　　神州近期一套電視劇《平凡的榮耀》揭開風險投資呢一行嘅神秘面紗，原來創業人士同基金投資有一種唇齒相依嘅關係，亦都顯示咗好產品自然大把人爭住投資。想創業嘅你缺乏資金點算好？睇下天使投資同創投公司幫唔幫到你啦！

 

（Shutterstock圖片）

　　

年輕人有想法但缺錢 天使基金點石成金！

 

　　全球都進入電腦時代，特別係年輕人有自學能力，不論飛天遁地、定係電腦科技，隨時都嚇你一跳！所以呢個時代最值錢就係一個「innovative idea」，不過光有idea，無錢實行又點得呢？銀行借貸又好少會批貸款畀呢啲咁高風險投資，呢個時候天使投資者就幫到你啦！

 

　　其實天使投資通常係企業家用自有資金，幫一啲有潛質嘅項目，但又難於借錢嘅創業人士，佢地通常一筆過投資數萬至數十萬不等，以換取公司小部份股權，期間唔會影響創辦人如何操作；假如公司產品去到某一個成熟程度，先會考慮加大投資額度，逐步咁幫創辦人打開知名度及令產品成功上市獲利。而產品類型可以天馬行空，不論App定食品，乃至生物科技、清潔能源都得，只要有潛力嘅都會搵到投資者！

 

　　就好似「超人」李嘉誠成立嘅「維港投資」，就係專門做相關嘅投資工作，呢間公司曾經參與過Facebook、Rzer、Zoom、Spotify公司嘅相關投資，呢種點石成金嘅能力同樣都為投資者帶來倍數級回報！

 

被創投公司睇中有運行 不到上市不罷休！

 

　　另外一種，就係好多人所講嘅創業投資，又或者叫「風險投資」，通常呢類由專業人士管理他人集合資金嘅創投公司會留意一啲高增長或有潛力嘅新創公司，而且又未上市。創投公司就會視乎公司業務情況或進度，進行ABCD輪投資，來換取公司一定程度的股權；除咗提供資金外，創投公司更會向被投資嘅公司提供部分援助，例如行業經驗、公關宣傳、與旗下相關公司進行合作等。

 

　　由於創投公司需要承受大量嘅風險，佢哋通常會避開初創公司嘅「種子期」，而選擇當產品或者業務已經逐漸成形先加入，且對被投資嘅公司管理參與程度都比較多，包括公司嘅產品點開發、方向點樣走，創投公司都可能管理埋一份，咁樣先可以憑自己經驗，將風險減到最低。而創投公司點樣獲利呢？通常被投資者嘅公司，當產品開發到一定程度嘅成熟，創投公司就會建議賣走件產品或公司，從而獲利；又或者更直接做法，就係幫間公司上市！當上市後創投公司就會沽售當初低價投資嘅股權，通常盈利會有十倍或者百倍回報！

 

（Shutterstock圖片）

 

點樣Sell到人投資？最緊要有遠見同詳細計劃！

 

　　講咁耐，其實都係想表達，市場上資金好多，但係項目好少，不論天使投資定係創投公司，都想搵一個百倍增長潛力嘅產品或公司。但作為創業家，又應該點樣開始好呢？

 

　　創業家第一步梗係要將自己嘅產品實體化，或者有一個原型，等投資者有一個概念；隨後要做市場調查，分析有無同類產品、市場飽和度、客戶喜惡情況、未來趨勢等，等投資者了解你個產品行業發展；跟住落嚟就緊要啦，就係要計劃你個產品可以幾時盈利化，或者訂立一個邁向盈利化嘅時間表，等投資者有希望咁睇到你件產品可以搵到錢，咁樣先可以說服到佢地投資你間公司或產品！

 

　　講就好似幾簡單，但創業夢一定困難重重！Make Money，not easy！創業家們加油啊！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票