2021-01-11
《Make Money》電動車大戰一觸即發！特斯拉vs蔚來vs吉利
近期個個股票谷都係得兩個話題：究竟買邊隻電動車股？要買邊架電動車好？要買邊架電動車真係好難答你，不過買電動車股就可以同大家「些牙」吓。早排特斯拉國產版Model Y低價上市刺激股價破頂；蔚來汽車又係Nio Day公佈新電池可行一千公里；吉利又話不排除同百度合作搞電動車。所以今集《Make Money》就同大家分析下三隻車股有咩分別啦！
（Shutterstock圖片）
特斯拉：降價促銷可否刺激股價？
（Shutterstock圖片）
2021年可謂「電動車大戰元年」，因為特斯拉汽車終於肯降價啦！美國最平版本賣34190萬美元（約26﹒67萬港紙），但續航能力只有392公里，不過對於一般中產家庭而言已經相對友善，如果上會分60個月供，月供都係4400蚊左右，都叫做買得過啦！
市場對於特斯拉呢套策略點睇呢？咁就梗係十分睇好啦！呢幾日股價日日破頂，上日仲高收至880.02美元，貼近歷史新高884.49美元。而且「空軍」們似乎都怕怕啦！沽空比例由去年9月約兩成幾，到而家都唔夠半成，有網友戲言，一個二個「空軍」都變晒燃料，幫緊特斯拉股價日日起飛！
雖然，目前特斯拉市值已經超過8300億美元，同「萬億美元俱樂部」距離又近一步。但有聲音指出，特斯拉同比特幣一樣，都存在係一個泡沫入面，而且以特斯拉目前業績，係撐唔起呢個市值，所以高追的話，同買大細係無咩分別，不過「空軍」日日唱淡，佢就日日破頂，會唔會係「今日低位明日高位」呢？
蔚來新款汽車出爐，電池續航一千公里！
（Shutterstock圖片）
另一邊廂，有「中國特斯拉」之稱嘅蔚來汽車，係1月9日晚嘅「Nio Day」公佈全新車款ET7，售價為44.8萬元人民幣，預計2022年第一季交付。呢次新車賣點係蔚來汽車放棄行內主流嘅液體鋰電池，而係採用固態電池技術，將能量密度提升50%，所以新款汽車可以續航一千公里！
對比起特斯拉嘅充電式汽車，蔚來汽車採取「換電式」，公司計劃興建更多換電站，目標係全國有500座，而第二代換電站嘅電池多達13塊，每日服務能力達312次，而且新車可以係換電站內自動泊入，用戶唔使落車且自動換電，而換一次電只需180蚊人民幣，除返開都係毫八子人民幣一公里，真係平到震！
蔚來汽車股價近期都「開車」啦，由10月份到嘅20美元，到上個禮拜破頂見59.31美元，股價幾乎係兩倍升幅，有大行睇股價可以到70美元，相比之下蔚來汽車股價都仲係起步階段，如果特斯拉可以升到2000美元再拆股，咁蔚來汽車個「未來」可以睇到幾遠呢？
吉利汽車不排除同百度合作，市場憧憬乜呢？
（Shutterstock圖片）
吉利（００１７５）早前吹風話今年開始做純電動車，最新就話母企浙江吉利與百度組建智能電動汽車公司，又話「不排除」會同百度合作。究竟吉利搞電動車有乜咁睇好呢？
首先，吉利作為內地大廠，整新款純電動車有規模效應，而且一早有良好銷售點及銷售網絡，可以令研發成本減低；其次，吉利係車聯網方面，假如真係同百度合作，而並唔係由自己從零開始嘅話，成本進一步減低之餘，研發時間都會減少，加上百度本身係路面嘅大數據資源豐富，真係一家便宜兩家著！
對比起其餘兩間電動車公司，吉利目前股價都係30幾蚊港紙，市值都係3200幾億左右，相對地比較平、潛力比較大，而且有埋百度資源幫助，真係如虎添翼！花旗都預計吉利係2021年至2023年每股盈利複合年增長有三至四成，所以目標價睇57.9元。假如真係有新電動車推出，唔知會唔會炒到咁癲呢？
撰文：李皆穎
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票
