《Make Money》千祈唔好畀騙徒Make Money！

 　　如果大家記憶猶新，本欄早前已經寫過「微信女」點樣周圍呃啲無辜嘅小股民。騙徒手法層出不窮，而家已經進軍Facebook，仲要開人頭假帳戶呃人，真過分！

 

（Shutterstock圖片)

化身多個假帳戶，博人唔覺眼中招

 

連我地etnet個icon都照抄，真係太過分啦！！！

　　近期大家碌Facebook，係咪周不時都見到啲人留言叫人入某啲「Whatapps群」、「Telegram群組」，標榜住「股票分享，即日討論賺大錢」呢類口號引人入群？其實都係換湯不換藥，入群之後就會「畀料」你，所謂Tips都係啲大隻出名股份，到你賺錢之後就叫你買入細價股，之後結果係點？唔使講啦！

 

本網真係深受其害，成日都有人喺「開市Goodmorning」直播留低呢啲Link，希望大家要望清楚，要即刻舉報！

　　不過呢類帳戶已開始變身，冒認某些紅人KOL，或者某啲股評人，甚至連佢哋帳戶照片、姓名都照辦煮碗咁Copy過嚟，博人唔覺眼以為真係股評人推介嘅股票谷。唉！真係睇少眼都出事！

黃國英被人冒認股民失百萬，有人扮黃德几騙色？

 

（Shutterstock圖片)

　　網上股壇老千成日派「山埃貼士」已經變成常態，原來呢啲老千可能係跨境運作！據香港股票分析師協會發出聲明指，有人冒認豐盛資產管理董事黃國英嘅名義，喺唔同平台「開谷」，之後有苦主向其公司查詢，先發現呢場「大龍鳳」；據稱呢位散戶已經損失七位數字計。聞說早前有個「谷」慫恿人買深藍科技（01950），最後股價大跌，股民損手爛腳；亦有指呢班網上老千係橫跨內地、香港、馬拉等地嘅國際級「人馬」啊！

　　騙財都算啦！原來連騙色都有；例如有騙徒盜用有「股壇黎明」之稱、金利豐研究部執行董事黃德几嘅大量照片，用佢張相呃人錢仲要呃埋中年大媽裸聊，之後錄影再勒索金錢。據黃德几指，佢睇過啲受害者同老千嘅對話，內容骨痺到死，真係嘔心！

睇清睇楚先好買，股票谷反成試毒針？

 

（Shutterstock圖片)

　　買賣股票嘅嘢梗係有升有跌，最緊要係睇清睇楚，唔好亂信「貼士」；如果真係實贏都自己賺咗先，又幾時輪到你呢？冒認名人呢家嘢，最緊要Click入去佢個人Profile，如果個Page只係得一百幾十人follow，又無相又無文，點睇都係假啦！更何況，喺香港如果持牌嘅要公開評論股份，係受到證監會法例規管，所以股評人唔會隨隨便便推介股份，大家應該要留意所謂嘅「貼士」係咩平台發布，個Facebook專頁有無認證等，唔好亂信騙子！

 

有人入晒呢啲谷，只要佢推嘅股份一概不買，都係另類玩法！

 

　　不過，有人就反行其道，正正就係因為呢啲股票谷推親都係啲莊家股、細價股，所以就用佢嚟做「試毒針」，凡係佢地推介嘅股份都會避開唔買。又係噃！其實當係避雷針咁又唔錯，買又唔一定會贏，但唔買一定唔會輸。

　　都係嗰句，要買股Make Money，自己要先做功課，買Ｄ有業績有前景嘅大型龍頭股穩陣好多，千祈唔好被騙徒Make你Money呀！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票