【消費形態】消費模式男女大不同，女性購物隨心，男性目標為本！

　　大部分商場主要入口，都係一啲針對女性客群而設嘅商店，如化妝品店、名牌時裝店等，除咗係因為化妝品嘅香味能夠吸引商場外顧客，亦因為女性較男性容易消費，能帶動人流進入商場。其實男／女嘅消費模式都好唔一樣，撇除一啲專屬為男／女而設嘅產品，唔多香港公司會針對兩種客群作出不同嘅營銷策略同投訴管理。而不同研究指出，只要能夠對症下藥，就可以令男性更容易洗錢，令女性願意洗更多錢。

 

「理性與感性」

 

　　男／女最明顯嘅分別，就係佢哋嘅購買目標同態度。男人多數以「目標為本」，理性消費，較少會亂洗錢。佢哋當購物係一種「解決問題」嘅方法，所以模式都好直接，入商店前已經計劃好晒所需產品，一來唔想同店員有太多互動，二來亦好想將整個過程時間盡量縮短，快快離開。另一方面，男性多數會將購物放於行程嘅最初／尾，舉例，當佢哋去商場購買風筒時，佢哋一進入商場就會先完成「任務」，又或者係陪老婆／女友shopping過後，離開商場前一刻先購買風筒，買完會即刻離開。

 

　　而女性就相反，多數以感情為主，購物隨心，所以多數女性唔會為shopping計劃行程，只會「邊行邊買」，亦會較男性多出現「衝動消費」。而女性喺購物時亦較注重當中每一個細節，由進店、揀貨、詢問、畀錢、售後，都會有好深嘅感受同記憶。亦有研究指，當女性進入「shopping模式」時，佢哋嘅腦袋會比平時靈活，所以如果購物遇到阻滯時，女性都比男性更快解決困難，務必買到心頭好為止。

 

「個人與公司」

 

　　有研究指，男／女性同品牌間聯繫性都好唔同，男性重點傾向以「公司」／「群體」為單位，如果公司嘅品牌形象同產品質素冇大變化，佢哋會較少換牌子，所以佢哋都會著重產品本身嘅質素同其保養，以減少轉換品牌同型號，希望選牌子時能夠「一步到位」。

 

　　而女性會傾向以「人」／「情感」為單位，對比男性消費者，女性較著重自己同店員間嘅互動、商店中嘅體驗，多於同品牌間嘅互動，對公司嘅代言人亦會較為關注。所以如果撇除產品質素同合適度，女性有可能會因為同店員嘅友好度高低而轉換牌子。反之，男性購物較少注重同店員嘅互動，所以亦甚少同店員溝通，多會選擇自己購物。

 

「投訴與分享」

 

　　另一份有關投訴嘅研究，指男／女消費者投訴時嘅著眼點同處理手法，亦有不同嘅反應。男性多數投訴嘅源頭來自產品，如投訴貨量不足、商店冇提供相關產品／服務嘅資料等。而女性則以人為主，投訴多數有關員工嘅服務質素欠佳、無足夠／適當嘅員工提供服務等，但有一共通點，就係佢哋投訴最多都係有關等候時間太耐。而當佢哋受到唔好嘅服務後，男性多數會即刻向店員／經理投訴，而女性多數向朋友／家人「分享」，所以相對地女性投訴帶來嘅影響比男性為大。

 

　　時代轉變，兩者嘅角色同取態亦開始慢慢互換，例如愈嚟愈多「男主內，女主外」嘅情況，爸爸／老公變成家經常性開支、節日嘅特別洗費、仔女嘅玩具支出等等嘅決策者。男性嘅消費態度亦開始變得少少「女性化」，以上嘅情況就會慢慢融合，進化成一個新嘅消費模式。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇