開心神醫

　　他眉笑、眼笑、咀笑，說話更搞笑。

 

　　並非社交達人，衹是舊區中醫。

 

　　首次見他時，當然先相一下，看有冇料，否則白吃了十劑八劑苦茶，豈不冤枉？

 

　　第一印象是頭骨圓、後腦靚，冇死喇掛！一定穩陣兼有蹺喇！

 

　　鼻頭有肉，眼帶笑意，富人情味，應該唔會大刀斬客、或者不斷加價。更唔會俾假藥、貴藥、含重金屬中藥俾我食掛。

 

　　再加埋佢成日笑、成日講笑，可以免費提供心理輔導。就算病不立除，心都開咗呀！

 

　　後來跟他熟了，上他醫館就像去見見陽光一樣，可以講下笑，充下電。

 

 

　　「醫師，你越來越肥，我越來越瘦喎！」我都唔怕死，指出他向橫發展，希望一會兒針灸時不會被報復啦！

 

　　「我開心囉！不過肥呢家野，開心可以肥，激心都會肥喎！你唔信？雞泡魚肥唔肥呀？唉！你咁瘦，係憂柴憂米，定憂國憂民？人最高智慧，就係四肢發達，頭腦簡單。」

 

　　「醫師你唔好頭腦簡單呀，你睇有幾多人等你救？」我的眼睛掃一掃成村待診的病人。

 

　　「唏！醫人係條件反射。」

 

　　「香港立立亂，你會唔會移民呀？」我問。

 

　　「香港咁好，打都唔走啦，我地背靠神州，所謂優國優民嘛。」

 

　　「祖國真係咁好？」

 

　　「你睇現在八點，祖國人民做緊乜？」

 

　　「吹緊水。」

 

　　「香港人做緊乜？」

 

　　「ＯＴ緊。」

 

　　「咁人地係咪優過你呀？仲有，佢地好食好住，乜都有得食，住既地方又大。」

 

　　「有Ｄ野食又毒又假喎！」

 

　　「增加免疫力囉！總之係優國優民啦。」

 

　　佢就真係優民啦，國內人可能收工先吹水，佢全日全天候吹水！而且係仲要磅水聽佢噴口水！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好