最新硬任務：谷高投票率

　　「完善選舉制度」後第一場立法會選舉，本文刊登之後剛剛一個月就係投票日，但相信各位讀者同Tina一樣，無論喺街上面定係喺網絡上面，都完全感受唔到絲毫嘅選舉氣氛。

　　呢股淡風愈吹愈淡，建制派當然係最清楚，所以見到早一個星期開始，建制派大佬個個講投票率嗰陣，都先行為可能出現嘅低投票率解畫。譚耀宗譚Sir就話，喺比較平和、理性嘅環境之下，投票率低唔出奇，咁係反映選民認同一眾候選人，唔使特意出嚟投票支持某一派，「大家都無問題、認同，咪好放心唔出嚟囉。」

　　前立法會主席曾鈺成就分析，好多市民或者唔清楚立法會選舉投票日同選區劃分，而地區直選參選人由以往8至10隊變為現時得3至5人，無之前咁熱鬧，都可能影響選民投票意欲，佢更話「投票率低唔代表甚麼」。好明顯，大家都係做緊「期望管理」，無希望就無失望，預測得返兩成投票率，咁開出來有兩成半，大家都歡歡喜喜。

　　不過建制派嘅期望同阿爺嘅期望似乎好唔同。阿爺辛辛苦苦為香港度身訂造一個完善選舉制度，希望愛國者治港之餘，更希望大家投入呢個新選舉模式，所以做到各個界別有得選。如果做到咁都咁低投票率的話，就的確會令阿爺一番心思付諸流水。

（資料圖片）

　　有負責地區直選嘅建制派人士就透露，谷高投票率已經係最新嘅硬任務，各政黨應該都收到指示，要落實提高投票率呢個硬任務，並且只問結果不問過程，唔理大家點樣宣傳投票，最緊要就係不能太低。呢位建制派人士仲話，最吊詭嘅係，至今大家都唔知點為之高、點為之低，背後根本無人夠膽落咩指標。佢自己就估計，縱觀各建制大佬言論及估計，背後可能希望以三成為界線，超過三成就已經當交到功課，不過當Tina問佢地有無信心「達標」時，建制中人就頻頻嘆氣：「睇呢個情況，泛民支持者都幾難會行去投票站，建制支持者的話，除非係某政黨協助過嘅市民同埋一班死硬紛絲仲話容易動員佢地去投票，咁嘅選舉氣氛之下，其他人亦都幾難叫得郁，呢個硬任務應該都係難以完成喇…」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇