民主黨優柔寡斷或致滅黨？

　　選委會完成晒選舉之後，政界嘅焦點當然係落喺12月19日舉行嘅立法會換屆選舉身上，而新一屆立法會選舉變動咁大，焦點都係非常之多，但Tina今次仍然將焦點聚焦於非建制參唔參選之上。

（資料圖片）

　　之前Tina已經多次寫過民主黨決定參唔參選嘅困難喺邊，估計佢地可能唔會用黨名義參選，但就唔會阻止黨員用自己名義去選。作為一直表明推崇民主嘅「昔日大黨」，萬萬想不到佢地對於參唔參選可以表達咁曖昧嘅態度，至今仍然係模菱兩可。

　　民主黨喺剛剛過去嘅周末召開會員大會，無就係唔係派員參選立法會進行表決，Tina聽聞，黨內聲音搞搞下已經幾兩極化，主棄由本來佔超過一半，經過建制派多番炮轟同黨內元老開聲之下，依家主選嘅黨員又有所增加，暫時真係一半半。

　　一班民主黨中委更加擔心，萬一黨內有任何「不參選」嘅決定，就算無違反法律，都可能令整個民主黨日後任何選舉都會因為今次決定被DQ，等同「滅黨」，所以黨內高層只能夠舉棋不定，並且有消息指出有黨員提出折衷方案，整一個黨內甄選機制，可能用一個高門檻去決定邊個可以代表個黨出選，既不否定參選，但能否派人參選又係未知之數，用「時間」爭取求存嘅機會。

　　泛民大黨優柔寡斷之下，其他打住非建制嘅就相對積極。有一席選委嘅新思維，據聞已經決定三條線爭議席，兩人爭直選、一人爭功能組別；另外亦有獨立非建制區議員喺區議會宣誓過關之後，都積極諗緊報名參選。

　　有建制派對於非建制參選就表示樂觀，因為阿爺搞完善選舉制度，目的都真係唔係清一色，亦都預咗有非建制嘅人入場；設立重重關卡，目的只係希望，認為自己係非建制都好，都一定要有返個譜，擁護一國、不得有異心，絕不能夠行偏，走返之前泛民嘅舊路。至於民主黨搞到今時今日，既然咁怕順得哥情失嫂意，相信會更令阿爺反感，可能真係會步教協、支聯會等後塵，成為歷史名詞。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇