邊個建制咁夠薑用粗口問候林鄭？

　　修訂《逃犯條例》呢個風波喺上個星期簡直可以話係瞬息萬變，Jenny同一眾行家都疲於奔命，食咗不計其數嘅催淚彈，去到今日先叫安靜咗少少。去到而家，一直態度強硬嘅政府終於「暫緩」修例，雖然係一個審時度勢嘅決定，但係Jenny收到風，原來林鄭呢下「急剎掣」，都「剎」到唔少建制派措手不及。林鄭梗係要急急腳密會建制，安撫安撫下，但係都平息唔到部分議員嘅怒火，聽聞席間仲有人直接爆粗，問候特首媽媽添吖！OH！NO！

 

 

 

　　究竟呢位咁夠薑嘅議員係邊位呢？Jenny見到啲行家已經好快手咁喺Whatsapp群組入面開咗個競猜遊戲：

 

　　行家A：會唔會係建制入面最好火氣嘅蔣麗芸（Ann姐）呢？

 

　　行家B：唔會啩，話晒Ann姐都係名門望族出身，點嬲都唔會去到咁粗俗啩？

 

　　行家C：唔通係一向心直口快嘅陳健波（波哥）？

 

　　行家A：佢都唔係直選！今次影響唔到佢幾多，點睇佢都唔需要咁激氣啦！

 

　　行家C：咁又係……今次最大影響嘅都應該係直選個批議員喇！

 

　　行家B：大家睇下，慢必喺Facebook到透露咗，原來係女議員嚟㗎噃！

 

　　行家A：唔通真係Ann姐？？（驚）

 

　　行家D：唔係囉！我睇咗星球日報，佢哋話「據了解，工聯會議員反應較大，麥美娟更激動地表達不滿，新民黨主席葉劉淑儀亦因有事在身須半途離場。」唔通係……

 

　　行家B：都合理噃……始終建制派入面最草根嘅政黨咪就係……但麥美娟真係夠膽咩？

 

　　經過一番熱烈嘅討論，睇嚟大家都愈嚟愈接近真相，喺一旁食花生嘅Jenny就覺得，無論係邊個都好，幾嬲都好，講粗口都係唔啱㗎！大家記住唔好學吖！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

•