立會邊個最怕「老鼠」？原來係「鼠王」

　　繼上年香港出現全球首宗人類感染大鼠戊型肝炎之後，上個月又發現多3宗新增個案，仲要係港九新界都有份！連政府都要再推全城清潔運動，加強滅鼠防鼠。政務司司長張建宗會唔會落埋場做下一任「清潔大隊長」就未知，不過今日就率先有「老鼠」入侵立法會啦！

　　原來今日立法會其中一個質詢就係講鼠患，係由工聯會何啟明提出嘅。佢一嚟就拎咗幾隻老鼠公仔同埋鼠籠出嚟，話「其實全港最大嘅逃犯應該係老鼠！」，食衛局局長陳肇始(Sophia)見到都忍唔住笑咗出嚟！

 Sophia見到何啟明拎啲老鼠公仔出嚟都忍俊不禁!

　　何啟明喺完咗呢個質詢之後，就帶埋佢堆「老鼠BB」出嚟「見記者」，即刻就有女行家被嚇到彈開幾呎遠喇！何啟明就話，自己都用過嚟嚇啲議員同事，原來最驚嘅唔係其他人，竟然係最關注滅鼠、關注到獲得「鼠王芬」之稱嘅經民聯梁美芬噃！何啟明仲引述芬姐話，就係因為驚先要滅鼠呀嘛！不過之前芬姐先講話自己要將「鼠王芬」呢個標籤由負面改為正面，以後「鼠王芬」係代表「撲滅鼠患嘅從政者」，但係見到老鼠公仔都咁驚，睇嚟芬姐呢條正名之路仲有排行喎！

　　何啟明仲同Jenny講，其實呢幾隻老鼠公仔同鼠籠都係「淘」返嚟！4隻公仔加埋個籠，連埋運費都係百零蚊，佢覺得好抵玩！仲話喺今次質詢之後就可以拎啲老鼠返辦公室「震宅」，咦？佢想搞邊科？！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！ ► 立即行動