為咗攞港鐵65折而早半個鐘頭返工 值得咩？

　　今年有唔少嘢都迎來幾十周年慶，例如我哋偉大嘅祖國建國70周年，而「六四事件」亦轉眼30周年。其實香港人對於「周年慶」一向都有份情意結，尤其係嗰啲有優惠嘅「周年慶」，當然包括埋各大百貨公司嗰啲！而關係到香港經濟死命脈嘅港鐵，今日（22日）都40周年啦！為慶祝港鐵通車40周年，前排先宣布要加價嘅港鐵，就話要出優惠賀一賀佢（算唔算係「補漏拾遺」呢？），10月實行喇！

「周年慶」很想要吧？

　　等Jenny Recap一吓呢一系列優惠先！首先6月30日至出年4月4日，向八達通乘客提供「程程3.3%車費扣減」優惠！仲有將現有嘅早晨優惠「加碼」，持成人八達通嘅乘客，逢星期一至星期五（公眾假期除外）朝早7點15分至8點15分喺指定車站出閘，車費優惠由75折加到65折，指定車站數目亦由原先嘅35個增至44個，包括樂富至油塘嘅9個新增車站！對於呢個「加碼」優惠，九龍東直選議員民建聯柯創盛同Jenny講，當然歡迎啦！不過佢就希望，港鐵可以正視一下九龍東多個車站月台嘅逼爆問題。

諗起要OT 計落唔啱數

　　至於新界西嘅代表、一向好關注港鐵問題嘅實政圓桌田北辰（田二少），都歡迎港鐵嘅新優惠！田二少同Jenny講，呢個早晨優惠有助紓緩港鐵朝早嘅擠迫情況，佢又覺得港鐵唔會因為今次嘅優惠而增加客量，只會改變部分乘客嘅出行時間，仲可能令港鐵收入減少，所以認為呢次港鐵完全係履行社會責任！

　　至於同區嘅民建聯陳恒鑌都拍晒手，佢仲建議「早鳥」優惠進一步擴展到荃灣西站！

　　不過，Jenny就覺得，對於打工仔而言，早上嘅時間係特別寶貴，當然係瞓多一分鐘得一分鐘啦！要Jenny瞓少半個鐘、提早返工去攞個65折優惠？我就真係未必響應到喇！事關早咗返公司，又唔代表可以早啲收工；即係變相要日日OT啦！為咗慳一角幾毫而要返多半個鐘工？計落真係唔太啱數喎！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好