公務員加5%人工 你又加幾多呀？

　　打工仔一年入面，相信最期待嘅應該都係加人工呢一刻喇！而薪酬趨勢調查委員會今日就公布咗會左右著17萬公務員生計嘅薪酬趨勢調查，建議今年公務員加薪幅度喺扣除遞增薪額之後，低層公務員加3.13%、中層加5.08%、高層加4.58%。

人工當然加得愈多愈好

　　薪酬趨勢調查委員會主席李鑾輝話，委員會係根據過去一年108間私營公司嘅薪酬同埋花紅變動得出呢個「薪酬變化數字」，話今年高、中及低層僱員嘅薪酬加幅分別係5.79%、6.29%及5.32%。李鑾輝仲話，個調查涉及14.6萬打工仔㗎喇，應該都幾有代表性嘅！只不過私人公司加薪幅度真係有咁高？Jenny表示有啲懷疑……至今身邊唔少朋友仔聽到都怒吼一句：「哪有5%！」

連埋「跳Point」好和味

　　話時話，低層公務員加得3.13%，上司們就加有4.5%至5%，點睇都Sad咗啲噃！如果你會咁諗嘅就真係太年輕啦！事關其實政府有個「慣例」，就係低層公務員會同中層公務員嘅加薪幅度睇齊，所以今年都好有可能有得加5.08%㗎！加埋「跳Point」嘅加幅，Jenny表示好葡萄呀！老總，你聽唔聽到呀～～～～～

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇