2019-05-15
修訂《逃犯條例》西環出口 林鄭決意唔收手
修訂《逃犯條例》「劇情」日日新鮮,常言政治一日都嫌長,Jenny都知大家好怕追唔切,小妹又何嘗唔係?所以近日都喺立法會捕到實,聽日建制派同民主派就會開會,但政府就未有聲氣會傾埋一份,究竟成件事點收科?Jenny好想第一時間見證!
司長牌錄音機
而家立法會因為個法案委員會「鬧雙胞」而陷入僵局,但係政府對修例態度一直冇軟化過,就算係噚日(14日)政務司司長張建宗同保安局局長李家超出嚟見記者,大家都以為會有咩新意,點知都係重複返之前一直所講嘅論調,Jenny同好多行家都搲晒頭,唔明點解要司長嘅寶貴時間出嚟做錄音機囉!
不過Jenny留意到一樣嘢,搞到立立亂咁耐,政府冇可能唔同中央政府溝通過,但遠在北京中央一直都冇親口就呢件事釋出好似禁港獨嗰時「一定要做、唔做唔得」嘅明確訊號,而支持修例嘅言論就多數係多重引述。依小妹愚見,加上有啲中資公司局內人嘅口風,阿爺一向「支持特區政府依法施政」大前題下,似乎就諗住由得林鄭一個人拆掂佢。話晒阿爺而家煩緊同侵侵講數,邊得閒放咁多心神理你香港呢個小地方吖!
西環出口 林鄭決意唔收手
不過,而家連阿爺代理人之一嘅西環都出手喇!原來噚日中聯辦主任王志民都趁著召開中聯辦領導班子會議,向中資企業負責人、駐港外交部及解放軍部隊高層講習大大喺全國公安工作會議嘅重要講話精神,席間仲提及修訂《逃犯條例》,叫大家多多支持噃!王主任將兩樣嘢擺喺同一場合向大家宣講,究竟係有意定無意,令人覺得呢樣係中央嘅最高旨意呢?
今日有報道仲引述消息話,林鄭今次點都會企硬唔撤回㗎啦!事關一撤,就等同切埋對腳,影響成個政府嘅管治威信,令政府變成「跛腳鴨政府」(Lame-duck Administration),所以佢梗係死都唔肯啦!今次仲有中聯辦做後盾,咁睇嚟林鄭今次可以無懼世事變改,迎難而上喇!建制派?當然都係時候歸隊啦!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票