政府之前去信立法會內會要求將《逃犯條例》修訂草案喺下個月12號繞過內會，直接交上大會恢復二讀，不過本身內會一早就定咗今日會去討論法案委員會嘅去向，所以亦都會處理埋政府嘅要求，而唔少議員都就呢個未來路向，提交咗建議函件。

三讀直接去馬？

　　Jenny睇返各位畀內會嘅函件，按慣例，政府提出嘅建議，建制派就多數撐，民主派就多數反，學暴龍哥話齋：「定律嚟嘅」！小妹就發現，激進建制派何君堯都有出信支持，但係睇真啲，最尾嗰句竟然話：「本人支持將草案直接交付立法會大會恢復三讀通過」？！咦？咦？咦？政府過去都係強調係想恢復二讀而唔係三讀，而且以小妹喺立法會打滾咁多年，認知完咗法案委員會審議嘅都係交付大會「恢復二讀」，從未試過「恢復三讀」！

建制隊友情何以堪

　　小妹仲記得，立法會前主席曾鈺成（曾主席）間唔時都寫文去同廣大市民解釋下立法程序，佢都係話「條例草案委員會完成審議後，便會交立法會大會，恢復二讀辯論。如果立法會大會通過條例草案予以二讀，便會進入「全體委員會」階段……完成此階段後，最後會進行三讀。一般來說，三讀時不會進行冗長的辯論。如果支持票不足，法案便不獲通過……」所以，如果直接三讀，先唔講合唔合議規，但立法會乜都傾都唔使傾喇，似乎就違背埋政府不斷強調話要釋除公眾疑慮、耐心解說嘅目標噃！

　　何議員，你咁做你叫班建制隊友、仲有李家超局長情何以堪呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票