老廉Open Day 有冇得免費飲咖啡？

　　大家有冇興趣去廉署飲返杯咖啡呢？唔好誤會，雖然Jenny返工係返廉署……附近，但都唔係咁想入廉署飲咖啡，不過！今次係廉署開放日吖！大家入咗去都可以好似CY咁平安出返嚟㗎！

走前特首都走過的路

　　今日廉署先發新聞稿，話為紀念ICAC成立45周年，將於下年2月及3月連續兩個周末，向公眾開放多項設施，畀大家親身了解香港嘅反貪歷史，同埋最新嘅肅貪倡廉工作。

　　開放日就會喺北角渣華道303號廉署大樓舉行，開放時間為2月23日（星期六）09:00至18:00、2月24日（星期日）09:00至17:00，仲有3月3日（星期日）09:00至17:00。有飛嘅市民就可以導賞形式參觀多項廉署設施，包括睇下首次開放予公眾嘅扣留中心、廉署展覽廳、模擬錄影會面室、列隊認人室、槍械設備同攤位遊戲等。每場導賞團大約係1個鐘零9個字左右啦！

開放日唔係年年有 5300張要靠抽

　　廉署唔係年年都有開放日㗎！對上一次已經係上年嘅6月中嘅事嚕，所以有興趣嘅你就記得要喺今個月28日之前申請拎入場券呀！因為得5300張㗎咋！如果申請數目超過限額，就會用電腦抽籤。2017年嗰次都已經有成萬六人報名，上次抽唔到嘅朋友，今次再試下運氣啦！

　　至於想飲遠近馳名嘅廉署咖啡要點做？Jenny記得上年收費係一杯$10.5，並唔係免費㗎！不過正所謂：「免費的最貴」，當你有得飲免費廉記咖啡，即係代表你已經被人拉咗or協助調查中啦！Jenny梗係希望大家奉公守法，做個廉潔香港人喇！咖啡都係自己畀錢買好！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情