葉劉話美國貨「都係危險」　鄧家彪「行動升級」換埋fb頭像撐華為

　　華為「太子女」孟晚舟喺加拿大被捕事件日日有新發展固然好睇過電影，另一方面喺手機界亦掀起一場腥風血雨，據過往經驗，一有外交風波，國人點都要發起「罷買罷用」以明心志。香港作為中國一部分，政界人士點可以唔響應一下呢？今日新民黨主席葉劉淑儀同副主席黎棟國兩位前政府高官都講明，要撐國貨用國產手機！而工聯會鄧家彪仲有心，直接將Facebook個頭像轉成華為Logo添吖！

葉劉：「所有美國貨都係危險嘅！」

　　做過保安局局長葉劉今日就喺電台節目話，自己而家就用緊Samsung，不過遲啲都諗住轉華為㗎啦！而且講到明除非冇取代品，如果唔係啲通訊器材都會盡量唔用美國貨，因為「所有美國貨都係危險嘅！」因為美國有權監察手機喎！不過華為好似都係用返Android系統，葉劉會唔會都唔多放心呀？計Jenny話，要防監察嘅話，用返舊式按掣手機例如Nokia 3310就至安全喇，Jenny細個睇電影入面啲特工都係用佢㗎！

阿Bill換Profile Pic網友以為入錯Page

　　而同樣係前保安局局長嘅新民黨副主席黎棟國就仲快手過主席葉劉，話自己一早轉咗用小米好耐，仲大讚「平、靚、正」添！雖然唔係華為，但都係國產，都算係撐國貨呀！

　　不過，今時今日咁嘅撐國貨態度係唔夠㗎！好似工聯會鄧家彪（阿Bill）就識做喇！一於喺孟晚舟傳出被捕嘅第二日（７日），就將佢個Facebook頭像轉做華為Logo。Jenny一睇仲以為自己入錯咗華為個官方Facebook Page吖！唔通阿Bill想發起「我們都是華為」行動？但就好似冇黨友響應喇，Jenny就覺得好似阿Bill激進咗啲，同埋最好就問過阿爺ike唔like先啦？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情