漁護署與其「銷豬」使$700 不如賣豬做善事

　　Jenny近排被食衛局局長陳肇始（Sophia）嘅「銷豬圖」洗咗版，講緊嘅就係早幾日漁護署為應對非洲豬瘟疫情，做咗個豬隻銷毀行動演習吖！但是豬豬這麼好吃，怎麼可以銷真豬！所以署方就大手買入咗卅隻豬豬公仔做演習，畀漁護署人員練習「銷豬」！

偉大淘寶有同款 仲要300蚊唔使

　　據Jenny所知，原來一隻大豬仔承惠700蚊，細豬公仔就平得多，80蚊就有交易，不過今次漁護署就入咗28隻大豬同兩隻細豬，埋單就要差唔多使咗兩萬銀喇！都咪話唔貴！Jenny身為消費者精明眼，即刻幫漁護署上偉大嘅淘寶格下價先！

　　原來呢隻BB豬好多大陸網民都勁Like，事關喺之前一個內地綜藝節目入面亮過相，即刻成為潮物，唔通採購人員都係呢套節目嘅Fans？之但係Jenny就發現其實個價格都只係200幾人仔，圍返港紙300蚊唔使，漁護署個報價夠買兩隻連運費有凸噃！難道說此豬都有分真假貨？

真誠建議「賣豬仔」反轉豬肚就係「始」

　　靠相難分真與假，不過Sophia個Facebook Post就引嚟好多「識貨之人」留言，話想「領養」BB豬返歸喎！雖然漁護署就話會再重用，不過演習一年有幾多次啫，Jenny都覺得不如順應下民意，來一個慈善拍賣吖，每隻豬仔仲付上Sophia親筆簽名，咁反轉豬肚就係「始」，諗起都覺極具收藏價值呀！計Jenny話，咁樣又可以慳倉租又可以做善事，何樂而不為呢？到時審計署都冇位入喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】卓林普經優才計劃成為香港居民，桌總冀當局放寬16歲以下青少年進入桌球室限制助年輕人接觸桌球，你是否認同？► 立即投票