噚日公布完《施政報告》，特首林鄭就要馬不停蹄咁出席電視、電台論壇，今朝仲要去立法會回應議員嘅質詢添！而今次份《施政報告》，大家都係關注喺大嶼山填海、23條立法嘅問題，Jenny已經聽咗林鄭嘅答案無數次，幾乎識背，不過去到質詢中段，林鄭同許智峯就爆出一段小插曲喎！

許智峯口快快結果畀位人入

　　近日的社會大事除咗《施政報告》之外，就應該係拒批《金融時報》編輯馬凱工作簽證事件喇！問來問去多名政府官員都唔願意回答，或者答來答去同一句，本以為冇乜人會再用質詢時間去問，但今日民主派嘅許智峯就決定喺會議廳問呢個問題喎！

　　不過，林鄭都答呢個問題答到熟晒，一貫咁講入境處係按照法律，同埋每一個個案嘅情況而下決定，慣例都係唔會公開原因㗎喎！許智峯聽到梗係唔滿意啦，大鬧政府「敢做唔敢認、唔敢解釋」、「非君子所為。」

林鄭用神回覆直線抽擊

　　本來呢句說話就冇乜特別，其他人鬧當然No problem 啦，不過「君子」二子出自許智峯之口喇喎，Jenny同行家們不禁嘴角微微上揚。林鄭從來唔係省油的燈，「叮」一聲意有所指咁話，既然講到「君子」，起碼個要求係「動口不動手」囉！

　　嘩！答得咁精警，Jenny都覺得林鄭呢下簡直係神回覆！鬼叫許智峯之前捲入搶女行政人員手機事件咩！小妹係佢嘅話就梗係「崩口人忌崩口碗」啦！不過許智峯成日都以直線思維做人做事，今次就被林鄭直線抽擊喇！Jenny真係要講句：「面係人畀，架係自己丟！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票