港鐵四線「共赴黃泉」 打工仔愁爆上演「返工」續集！

　　今日打工仔嘅惡夢又重臨！冇錯，就係港鐵又喺返工時間壞車啦！仲要係禍不單行，唔係雙行亦唔止三行，係四行！最初一壞同時壞最主要嘅3條路線，即係觀塘線、荃灣線同埋港島線，額外行車時間要多出40分鐘，仲未計要等幾多班車先上到，Jenny表示咁同半個香港癱瘓咗冇分別囉……

 

 

 

如果道歉有用的話……

 

　　一炮三響，港鐵都不得不罕有咁未修理完就要出嚟解解畫。港鐵車務總監劉天成就出嚟向大家致歉，同埋話以佢自己嘅記憶，都係第一次遇到3條線一齊壞㗎咋！劉生你就第一次見三線齊壞，不過Jenny同廣大打工仔就唔係第一次經歷港鐵壞車喇！如果集齊幾廿個「道歉」，有冇得換禮品先？

 

將軍澳線都冧埋 

 

　　正當劉生啱啱先講完呢3條線嘅事，轉個頭連將軍澳線都同佢哋「共赴黃泉」，Jenny就好似聽到將軍澳線喺到吶喊：「兄弟，唔好漏低我，我嚟陪你哋喇！」

 

　　將軍澳線同佢嗰3條「兄弟」齊齊「罷工」，Jenny同一眾打工仔真係嗌晒救命！尤其是將軍澳市民屋漏偏逢連夜雨，冇得搭地鐵之餘，將軍澳隧道附近仲喺兩個鐘頭內發生兩次車禍。地鐵又塞、路面又塞，完美呈現咩係「孤島」……

 

一日三次解畫 仲要等調查

 

　　發生咁大件事，港鐵都要一日出三次嚟解畫。佢哋中午就話，全部鐵路喺今日11點9全面恢復喇，不過事件起因就仲係有待調查；去到晏晝，港鐵常務總監金澤培都係冇講查到咩原因，只係話會邀請港鐵外面嘅信號系統專家成立委員會嚟調查，仲話會擇日補償返個半價優惠畀市民添！不過，要拎你個半價優惠，咪即係又要搭返港鐵，到時如果又壞嘅話……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情