林鄭同設計師好啱Key 「團結香港」新衫夠意思

　　女人永遠唔會嫌衫多！相信就算係身為特首嘅林鄭都唔會例外，今日Jenny見到林鄭去咗理工大學紡織及服裝學系「展才設計」頒獎禮時，就有位殘疾人士設計師送咗件斗篷外套比佢，林鄭梗係好高興喇！仲即時著上身添！

　　呢個設計比賽係為咗鼓勵長者同埋殘疾人士發揮設計才華，由唔同背景嘅同學協助350幾個長者同殘疾人士設計師，將佢哋嘅設計意念轉化成設計圖，並將優勝作品製成服裝。而林鄭收到個件就係其中一件喇！呢件外套外面繡咗「HONG KONG」嘅字眼，亦都用咗繩結將啲字母連埋一齊。設計呢件衫嘅殘疾人士吳貴玲話，個寓意就係凝聚香港，希望林鄭月娥能夠團結香港，減少糾爭咁話喎！

　　呢位設計師嘅諗法，Jenny肯肯定林鄭同佢「合晒合尺」！事關「團結香港」呢4個字，小妹記得當初林鄭由參選，到而家都一直話想做、要做，不過做起嚟邊有口講咁容易呀！所以林鄭自己都喺致辭時話，「團結香港」係佢嘅願望，亦都係唔少市民嘅期盼。不過睇嚟要實現呢個願望就仲有一大段距離，唔知林鄭會唔會將吳女士嘅心意收起，得閒著出嚟提醒吓自己呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情