立法會入面嘅「單頭議員」毛孟靜（Miss Mo）、朱凱廸（阿廸）、街工梁耀忠同人民力量陳志全（慢必），舊年整咗個聯盟叫「議會陣線」，話希望可以令民主派第四板塊有個平台去溝通同合作。而補選過後，立法會又多咗兩個「單頭議員」就係區諾軒同范國威（咖喱飯）喇，毫無懸念之下都加入埋「議會陣線」。數數手指，「議會陣線」而家同「專業議政」人數一樣，做埋民主派內第二大板塊，僅次於喺立會有7個議席嘅泛民大黨民主黨咋！

潛力圖嚟喇!

朱凱廸：我寂寞慣了

　　「議會陣線」今日就開記者會，區諾軒同范國威正式加盟，「加盟禮」簡單得來都有唔少笑料。首先就係影相之時，以前「議會陣線」得4個人，一人拎一個字牌影相剛剛好，而家多咗兩個新人，即有人冇牌拎，Miss Mo就好關心企最邊邊嘅阿廸會太寂寞，點知阿廸來個神回：我寂寞慣㗎喇！嘩！Jenny一聽，似乎有啲弦外之音？

　　到拎住牌影相時，有攝記大哥忍唔住講咗句：潛力圖呀！Miss Mo即刻一臉狐疑，猛問：「咩係潛力圖？」此時咖喱飯就解釋即係可以畀人隨便改圖……慢必仲即刻指住字牌加多句：「好似民建聯果幅咁呢……」Miss Mo當堂Get到晒啦！民記今次躺著也中槍喇！

慢必贈區諾軒護腰 

　　話晒係加盟禮，簡簡單單都要送份禮畀新加入嘅人。慢必向區諾軒送咗個護腰，話據佢經驗之談，喺議會抗爭嗰陣，同保安衝撞好易整親條腰，有護腰就可以好好保護呢個重要部位。Miss Mo就止痛貼話戴唔到護腰都可以止住痛先。係㗎！腰對男人好重要㗎嘛！范國威就收到慢必送嘅喇叭，話因為而家啲委員會主席好惡㗎，郁啲就熄人咪，有咗喇叭仔就可以隨時隨地發言啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好