答問大會竟然有「雞」有「公廁」？！

　　311補選過咗咁耐，幾位議會新丁都可以話係上晒手，民主派區諾軒同范國威一入議會就Join咗毛孟靜（Miss Mo）嘅議會陣線，搵隊友Backup；民建聯鄭泳舜（舜仔）更加唔使講，有民記咁大個後盾，只要冇講錯嘢、唔行差踏錯，坐好個位就得（不過上次唔去開一地兩檢個會就曳曳囉！）。今日Jenny就喺立法會巧遇之前喺311輸咗畀區諾軒嘅陳家珮（Judy），佢都嚟做「議會新丁」噃！不過就係做佢師傅葉劉嘅議員助理！

 

 

Judy有幾開心，真係隔住個mon都Feel到!

 

Judy落選又如何？變身葉劉嘅議助！

 

　　葉劉話，係經過公開招聘決定請Judy嘅。不過係人都知，Judy本身就係新民黨嘅人，到底係如何喺公開招募下，最後都係決定由Judy做呢個位呢？一係就冇人應徵，一係就「公開招募」係流嘅，不過Jenny就覺得，無論係邊個答案，個觀感都唔係幾好咁囉！

 

　　葉劉就解釋，311之後Judy對立法會啲嘢好熟，咁啱佢近排又有位議助走咗，所以咪搵Judy做Part－time囉！Judy仲透露呢份工月薪係得1萬蚊㗎咋！不過勝在有彈性，唔一定成日都要喺立法會當值，可以出去處理吓投訴、見吓組織咁，同區議員份工時間上冇乜衝突。Jenny見Judy今日心情靚靚，又跟出跟入咁，仲同記者們賣晒口乖咁話日後要同大家多多溝通，睇得出Judy可以得償所願「入議會」有幾開心喇！

 

有「雞」有「公廁」？！

 

　　講返今朝立法會個行政長官答問環節，Jenny喺咁嚴肅嘅場合之下，竟然聽到有「雞」有「公廁」噃！講緊嘅就係Miss Mo喺質詢時，一嚟就話「香港嘅政治就充斥好多『雞』」！咩「雞」呢？Miss Mo就解釋話，例如係戴耀廷之前話自己係「殺雞儆猴」入面嗰隻被人殺嘅「雞」、李柱銘就話港珠澳大橋人工島防波堤事件係「死雞撐飯蓋」，但係佢自己最擔心嘅就係「人哋出豉油，我哋出雞」，仲要最後自己都唔敢食（用）添！因為錢就香港出大份，但係監管方面就乜都唔知，大家都好難對條橋有信心㗎嘛！此「雞」不同彼「雞」，小妹明白了！嚇死人咩！

 

 

講起雞，小妹腦內即時出現呢個畫面......

 

　　咁「公廁」又係乜一回事呢？原來係旅遊界姚思榮話，而家香港唔少旅遊點嘅公廁設施好差，問林鄭會唔會好似習大大咁搞返個「公廁革命」喎！林鄭都知公廁會影響旅客觀感，不過都係一如既往咁話好關心、有決心改善，但就聽唔到有咩「革命性」嘅新諗法。梗係啦！「革命」只能中央搞，香港自己搞革命，想死咩！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港鐵失倫敦伊利沙伯線專營權，你認為「國際化」遇挫的港鐵應否將重心轉移回本地？► 立即投票