聽日就係4位新任立法會議員宣誓嘅日子。講起宣誓，相信大家最記得都係長毛梁國雄啲道具，不過經過人大主動釋法之後，就冇咗呢支歌仔唱喇！仲令長毛都被DQ埋添！今次4位新任議員上任，有2個都係民主派，但係佢哋都講明今次宣誓係「三無」，即係「無加料、無道具、無特別服飾」，費事又再被人DQ，又要補選多次喇！

講起宣誓，相信大家最記得都係長毛梁國雄啲道具。

　　之前就有傳言話，建制派唔會咁順攤畀民主派宣誓，仲話會製造流會添！不過民建聯主席李慧琼（琼子）就否認呢個講法，話係傳言喎！不過有人就話，係因為佢哋黨嘅「新仔」鄭泳舜排喺兩個民主派後面，如果為咗阻民主派上任而流會，舜仔咪成世都唔使旨意就任囉！所以大部分建制派都唔贊成呢個兩敗俱傷嘅方法。

多謝真．阿爺！

　　至於聽日宣誓條隊，第一個係范國威，跟住到區諾軒，再跟住到鄭泳舜，最後係功能界別嘅謝偉銓。Jenny估有唔少讀者都有個疑問，點解會係民主派先宣誓呢？個答案其實同政黨同光譜係冇關係嘅！反而係同佢哋阿爺有關！係真．阿爺！

　　原本宣誓個排序係跟議員嘅年資而排嘅，但如果有啲議員嘅年資相同，就會跟佢哋個姓氏筆劃排名嘅！不過因為今次係補選，當選人嘅宣誓就跟姓氏筆劃排名，得出咗「范、區、鄭、謝」呢條隊出嚟喇！所以話阿爺幾重要！舜仔先獲北方「阿爺」力撐，加埋「攬攬爸爸」成功吸票之後，范國威同區諾軒嘅爺爺同爸爸就喺姓氏上，幫佢哋避免咗場無妄之災喇！嗱！聽日醒醒定定喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇