國歌法立法後冇得二次創作？球迷唔准「遲賴」了？

　　《國歌法》今個星期五（23日）就要喺立法會討論喇！Jenny呢幾日上網，都見到唔少網民開始擔心緊《國歌法》殺到，自己會唔會好易中招！

 

 

有得聽而家好聽多啲喇！

 

球迷奇遇記點算？

 

　　大家都知喇！細細個創意爆棚嗰陣，梗係咩都拎嚟玩一餐！呢度有邊個細個未試過自己改國歌歌詞、校歌歌詞呀？Jenny仲好記得小學年代學唱國歌嘅時候，身邊有啲特別調皮嘅同學仔都會改吓歌詞，小息嗰陣同同學一齊唱，唔知點解又真係易記過正式版本㗎喎，小妹到而家都仲記得㗎！仲可以話係我哋嘅童年回憶添！

 

　　亦都有網民擔心，如果自己係李克勤Fans，「唔覺意」收藏咗隻《球迷奇遇記》嘅碟，就無啦啦被人告，都咪話唔驚！咁多人有疑慮，梗係要問吓權威意見喇！不過相信大家聽完之後，可能驚多兩錢重！

 

網絡23條前 先整條《國歌法》熱吓身

 

　　事關唔少建制派人士呢排就彈出嚟話立法之後，就唔可以二次創作喇！例如啱啱貴為全國人大常委嘅譚耀宗（譚Sir）第一個就出嚟講：「二次創作國歌同創作自由無關」，直情係「以身試法」添！經民聯梁美芬都話「有一定風險」，大家唔應該利用國歌做二次創作。

 

　　做咗行會成員嘅湯家驊（Ronny）亦都同梁美芬同一口徑，話「立法後一定唔會有二次創作嘅空間喇！因為二次創作入面係唔係有侮辱成分會有好大爭議。」即係就算改嚟讚頌國家都唔得？睇嚟「愛」字派人士都要注意喇！想當年有「網絡23條」之稱嘅《2014年版權（修訂）條例草案》因入面有關二次創作嘅爭議，受到社會強烈反對，都未完全喺立法會正式通過，睇嚟而家先整條《國歌法》畀政府「熱定身」，話唔定就係為「網絡23條」重臨鋪路？希望係Jenny諗多咗啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情