2017-10-20
「恩恩豬」玩臉書出神入化 無懼嘲笑又識冧人
話說今屆議會新丁之中,新民黨嘅 Eunice容海恩聽聞係「友誼小姐」,同唔同黨派都有偈傾。咁有人緣,唔通靚女真係著數啲?梗係唔止咁簡單啦!事關Jenny呢排就成日見到Eunice玩Facebook,當中同網民嘅互動令Jenny嘖嘖稱奇!佢之前接受訪問時都話,而家啲網民仲會叫佢「恩恩豬」添!
噚晚Jenny碌碌吓Facebook,有朋友就畀咗幅填色比賽嘅圖小妹睇,原來唔知點解有人將啲青色填咗去Eunice塊面上邊喎!搞到Jenny笑到腹肌都出埋,諗住Send畀「恩恩豬」睇,原來佢已經睇咗,仲上載埋去自己個專頁同大家分享,hashtag埋#elf容,話自己係「容精靈」添!連輔仁媒體嘅「容總」容樂其都有份留言吹水,「恩恩豬」真係好叻叻豬呀!
「容精靈」,十分勁!(容海恩Facebook)
其實「恩恩豬」玩Facebook叻唔係第一日嘅事,佢前晚仲同「網紅」容總約埋一齊食飯添!不過「恩恩豬」嘅然出身新民黨,立場好明顯係建制派啦!點解佢又會同到立場親泛民嘅「容總」同枱食飯呢?
「雙容聚會」,「容總」仲大讚Eunice「肯定係全部議員之中最靚女」添!(容樂其Facebook)
呢樣就要追溯到「恩恩豬」9月嗰陣話想分享同留言容總嘅貼文,所以就邀請「容總」Like佢喎,點知就引嚟大批網民食花生。「恩恩豬」嚟到非建制陣地,仲被唔少網民暗串添!點知佢唔單只冇黑面,仲貼埋自拍以證係用「真身」留言。之後雖然被人話佢多雀斑,但係佢唔似得一般港女咁「開佢拖」,仲叫人「介紹啲好嘢嚟搽」;又有人串佢派「蛇齋餅糉」,點解唔派埋畀後生仔,「恩恩豬」都冇嬲嬲豬,幾日之後竟然直播親手整冰皮月餅,仲派埋畀「容總」食添!「恩恩豬」又識講嘢又親力親為,難怪做到「友誼小姐」啦!唔知佢又可唔可以幫手「改善行政立法關係,修補撕裂」呢?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票