特首林鄭選戰嗰時搵左佢港大校友、公關專家麥黃小珍(Sandra)幫手打仗，好多人都以為Sandra應該會喺林鄭當選之後，入局做新聞統籌專員(IC)，不過IC呢個位到而家都未有聲氣。究竟Sandra近排搞緊咩？

 

（左起）香港女工商及專業人員聯會理事韓淑儀、創會會長黃汝璞、會長麥黃小珍、選舉籌委會主席蔡美碧。

 

Sandra心痛林鄭太頻撲

　　其實身兼香港女工商及專業人員聯會會長嘅Sandra近排忙緊「傑出專業女性及女企業家選舉」，經過一輪專業評審之後，今日就公布結果，28號就舉行頒獎禮。(Jenny覺得絕對有心同嚴謹過選港姐多多聲！)Sandra同Jenny講:「到時香港最傑出嗰位女性都會過來呀！就係我哋特首囉！」Sandra仲話心痛林太上任以來四圍去未停過，「佢成日都係咁，太勤力喇！」

做IC？Sandra:唔喇！

 

　　當然小妹亦都趁呢個機會，同Sandra傾吓佢做咩唔入局做IC先？佢即刻笑住同Jenny講「咪搞喇！唔喇！太辛苦喇！做完競選之後有啲怕怕！」Sandra仲好坦白咁話，佢都係鍾意而家做緊嘅工作多啲，要佢24小時oncall做IC真係未必應付得到，仲好謙咁話留返畀更加適合嘅人去做吧！所以，IC人選真係寧缺勿濫㗎！

國家體操隊將訪港

 

　　八卦完一輪，Jenny介紹返另一件盛事畀大家！相信係唔少讀者都鍾意睇嘅體操表演，仲要有國家隊撐場，唔係唔睇呀嘛？！

 

　　「國家體操匯香港」將會喺10月21號同埋22號喺灣仔伊利沙伯體育館舉行，大會話請到國家隊嘅體操精英同港隊代表一齊合作。民政事務局體育專員楊德強同Jenny講，體操係一項好有觀賞價值嘅運動，亦都知道好多香港人好有興趣。計Jenny話，梗係有興趣啦！事關體操隊有好多靚仔靚女，個個都fit到漏，就算佢哋就咁企定定喺度都夠晒養眼！

 

Angel(左)同師妹吳恩言(右)一齊即席表演平衡木體操，Jenny睇到眼都唔眨。

黃曉盈傷癒復出，將戰亞運

　　雖然小妹今日見唔到國家體操隊嘅成員，但係就可以睇到我哋嘅港隊代表做示範。其中最出名嘅，就非曾經代表香港出戰過2012年倫敦奧運嘅黃曉盈(Angel)莫屬，佢今次就會夥拍佢師妹吳恩言一齊表演平衡木體操。Angel自從兩年前備戰亞洲賽時重創左膝十字韌帶之後休息咗一排，而家終於都好得七七八八，重投返體操嘅懷抱。

 

　　佢仲同Jenny講，去完今年個全運會，感覺就好似經歷完好多嘢再入返去咁，本身都好擔心自己唔能夠做到，好開心最後都成功咗！而家嘅目標係下年嘅亞運，仲會爭取喺今年年底參加邀請賽熱吓身。佢又話，雖然自己到咗30歲，但係心態上已經唔再擔心年齡問題，反而係聽自己嘅身體話，只要狀態允許，佢都會繼續去做！睇到佢呢份毅力，Jenny不禁要講句:「香港勁揪」！

下周四開始撲飛

　　想睇國家隊同港隊代表嘅英姿，大家可以喺9月28日開始喺城市售票網買飛，票價有分200蚊同100蚊兩種，豐儉由人。Jenny仲帶咗個好消息畀大家，贊助今次表演活動嘅大新銀行執行董事王美珍話，為咗可以同基層市民分享今次嘅喜悅，佢哋仲會撥出部分飛畀啲基層家庭免費嚟睇，有興趣又擔心票價貴嘅朋友記得多多留意啦！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情