噚日講到立法會補選未公布詳情，建制泛民就爭得如火如荼，Jenny講一日都講唔完，今日就同大家講下九龍西同埋唯一一個要補選嘅功能組別「建築、測量、都市規劃及園境界」而家又係咩情況啦！

 

Vincent揮低咗Chris，獲民記今次全力力谷。

 

鄭泳舜出戰　杏兒會撐姐夫嗎？

 

 　　九龍西方面，可以話係同噚日提過嘅新界東差唔多，一樣係兵家必爭之地。當初民記都有兩位想選，分別就係深水埗區議員鄭泳舜(Vincent)同埋油尖旺區議會主席葉傲冬(Chris)，兩位都實力差唔多，後台差唔多，知名度又係差唔多，但係「兩個只能活一個」的情況下，Vincent揮低咗Chris，獲民記今次全力力谷。不過Chris又唔使失望嘅，仲有第二次機會呀嘛！

 

　　順帶一提鄭泳舜係前大台藝人胡杏兒嘅姐夫，仲係保良局前主席鄭錦鐘的公子。唔知到時胡杏兒會唔會都出來幫手拉票呢？

 

　　雖然大家都睇得出民記好想集中票源，盡地一煲，但係建制中想選嘅又點只民記一黨呢?一向立場好「自由」嘅自由黨都有啲聲氣，似乎就想再派出佢哋黨嘅青年團主席李梓敬(Dominic)選多次噃！Dominic一直係自由黨悉心扶持上位之新一代，其實Dominic都幾乎係打開口牌咁滯，佢喺報章入面寫嘅文，言詞之間可謂司馬昭之心。只係僧多粥少之下，Dominic係咪夠民記Vincent揮?相信佢要喺形象上面落下苦功。

 

  

阿基今次想出選，但似乎要成功唔係易事。

 

泛民立立亂　阿基又來了

 

　　泛民方面又點呢？繼續係立立亂、唔知想點咁款，畀網民成日諷刺佢「戀棧權位」嘅民協馮檢基，似乎蠢蠢欲動想出來選，而當日話過唔支持阿基出選嘅莫嘉嫻，Jenny就聽到唔少風聲佢可能加入民主黨，有可能會喺出年幫民主黨嘅袁海文拉票，亦成為阿基出選九西嘅最大暗湧！但問題又嚟喇！ 袁海文知名度好似真係好一般，眼下形勢，只有民主黨鐵票已經唔夠，而家即使有「外力」相助，又能唔能夠突圍?Jenny覺得危危地。仲有、仲有被DQ咗嘅劉小麗又話積極考慮出嚟選，但佢而家會上訴噃，如果上訴得直，咁咪一人揹咗兩個議席?即係到時又再補選多轉?選舉事務處真係好唔得閒喇！

 

謝偉銓明言再戰建測界

 

　　建築、測量、都市規劃及園境界方面其實就冇咩好講，噚日講過姚松炎未有表態會重奪議席，或到港島區出選，表示自己的彈性較大，不論是港島區或建築、測量、都市規劃及園境界的議席，均可以角逐，會積極考慮參選。不過，前任建測界議員謝偉銓已表明積極考慮參選。

 

　　不過諗深一層，林鄭係唔係真心想「大和解」，定係已經預見到泛民唔會拎得返晒呢6席呢?你知啦，講配票同團結，泛民又點夠建制嚟呢?再加上自決派同本土派一直都不屑同傳統泛民傾偈。照Jenny睇，雖然今次分開選，如果非建制協調唔到，真係隨時一席不保！

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情