爆肌男甘為卿姐刻上「愛的紋身」是誰惹的禍？

　　Jenny今日Facebook畀兩段片「洗板」，一段係一名外國大隻佬竟然喺手臂上紋咗「劉慧卿」三個字，莫非係「愛的紋身」？另一段就係完咗選戰之後，Hea咗一排嘅曾俊華（薯片叔叔）又出山拍片，幫「黑暗中對話基金會」籌款。

 

 

呢三個字......咁就一世。

都是Google Translate惹的禍

 
　　外國大隻爆肌男手臂上嗰個「愛的紋身」，成為咗今日嘅政壇網絡熱話，真係不得了！笑到Jenny差啲抖唔到氣！話說有網民發現有段片本來係個外國人講點樣做Gym「爆肌」，呢個時候梗係要Show Off吓佢自己啲肌肉啦！但係，扯起衫袖呢個Moment，最吸睛嘅唔係佢隻「老鼠仔」，而係喺「老鼠仔」上面，竟然紋咗大大隻三個中文字「劉－慧－卿」（卿姐）個中文全名！搞到大家唔使練都「笑到出腹肌」！

　　Jenny都當堂嚇一跳，然後得啖笑，皆因卿姐都笑住咁話一朝早已有share畀佢睇，佢根本同呢位爆肌男素未謀面。有人就估會唔會係呢個外國哥哥仔個女朋友叫Emily，又特別鍾情於中文，所以想紋個中文譯音上身，點知就畀偉大嘅Google
Translate誤會咗，以為佢想搵卿姐(Emily Lau)？不過，話唔定人哋真係卿姐Fans，唔通又話你知咩！你當卿姐吊帶裙流㗎！　　

　　大家留意吓01:45左右嘅位置！https://www.youtube.com/watch?v=6-j8m5HgzMM

 

  

你拜倒我吊帶裙下了吧？（設計對白、資料圖片）

薯片出山拍片唱歌仔籌款

 

　　另一條片主角都係男人，不過唔係大隻仔，而係薯片叔叔！話說John Tsang噚日就喺佢個競選專頁到上載咗條短片，令到佢班Fans勁驚喜，仲大嗌「好掛住你呀」！片中嘅薯片叔叔似乎就冇乜點變，不過佢就向大家透露近排忙緊搬屋，仲罕有影埋屋內嘅情況畀大家睇！佢仲喺條片到預告埋今日都會有新片出，薯片叔叔似乎真係想轉行做YouTuber？

 

　　果然未到Lunch，薯片叔叔就上載多條片喇！原來係幫「黑暗中對話基金會」籌款嘅宣傳片，仲同相識多年嘅著名失明人士、前公民黨創黨黨員莊陳有齊齊唱歌仔。薯片叔叔話雖然有時大家政見唔同，但朋友出到聲就梗係第一時間應承！

 

 
五年預言有玄機？

 

　　選舉過咗咁耐，薯片叔叔出咗片三個鐘咁大把，已經吸咗8000幾個「Like」同「心心」，同埋500幾個「Share」，一個「嬲嬲」都冇！其實Jenny真係覺得轉行有得諗，想做咩都得，得閒Hea吓又得，出吓活動亦得，得咗！需知道其他想做KOL嘅網民，唔知儲幾耐先儲到嗰一千幾百個Fans，邊學得薯片叔叔開兩句金口就有咁多「Like」呢！

 

　　心水清嘅Jenny就發現，呢兩條片都係薯片叔叔用競選專頁嚟上載，仲要喺條預告片結尾有一句:「五年之後，香港一定會更美好」。五年之後，又一屆新政府，呢句有咩玄機？大家即管參透吓喇！

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》【親子溝通】怪獸家長原來都有呢啲通病！相處有一件事切忌？► 即睇