工黨大地震阿珊出走何姨姨話唔玩......點收科？

　　「天鴿」襲港澳，呢隻惡鴿搞到澳門雞毛鴨血，斷水斷電又斷糧，仲要出動解放軍幫手善後。呢頭「天鴿」威力強勁，呼呼風雨不停，嗰頭工黨就「大地震」，仲餘震不斷！

 

　　事緣Jenny喺星期三(23日)留意緊「天鴿」嘅風暴消息之際，工黨就帶來咗另一個「政壇風暴消息」畀Jenny，原來工黨主席胡穗珊宣布辭職兼退埋黨添！消息突然到連佢啲黨友都O晒嘴，因乜解究阿珊今次咁決絕啊？

 

邊個同阿珊有「牙齒印」？

 

　　之後有行家聯絡到阿珊問個究竟，Jenny當然要八一八啦！原來阿珊話，喺黨嘅架構問題入面，見到有啲人喺處理問題上「非常之唔公道」喎！仲有黨友都同傳媒透露，喺黨入面長期以來有人疑似「蝦」阿珊，對佢好唔公平，細至佢點著衫，大至話佢喺上屆黨執委會選舉時阻住其他人當選。之後阿珊向紀律委員會投訴，但委員會講完投訴成立之後又話「不作裁決」，所以佢終於頂唔順，要爆喇！話今次辭職同退黨「係一個抗議」，不過就話費事指名道姓講邊個喇。

　　雖然阿珊唔講係邊個，不過心水清嘅人都估到一二㗎喇！嗱！據小妹所知喺工黨入面，相傳同佢有「牙齒印」嘅應該就係工黨嘅創黨元老之一嘅何秀蘭（何姨姨）。

　　果然冇估錯！今日何姨姨就好誠實咁出聲明話，自己係涉事嘅一方，主席退黨令工黨要面對危機，自己都要負上政治責任，所以辭去執委同副秘書長職務喎。佢又特別提到工黨嘅目標係「交棒給新一代左翼，祝留守工黨的年輕黨友茁壯成長，並以民主胸襟發展工黨。」

 

 

相嗌唔好口，希望雙方可以握手言和啦!

 

梁游終極敗訴 青年新政唔解散

 

　　幾時都話政治往往比戲劇更出人意表。之前工黨就話想年輕化，所以好多老一輩都講到明唔選主席，令阿珊年僅35就做到工黨主席呢個位，另外兩個後生仔郭永健（現30歲）同趙仕信（現25歲）就做副主席，但係就爆出今次嘅年輕主席退黨事件，對一心想年輕化嘅工黨都咪話唔大打擊，難怪何姨姨都要特別強調返呢樣嘢啦！

 

　　講到政黨危機，青年新政梁頌恒和游蕙禎今日被終審法院駁回上訴申請，終極敗訴之下，仲要面臨揹上巨額訟費，同埋畀人追討議員薪津。大家應該估「青年新政」應該係咁先喇！但係今日游蕙禎就喺庭外話，唔會解散青年新政，又話議會外有另一片天。睇來江湖從此多事喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情