【職場歧視】高人一等的外國人？別因為「崇洋」而踩自己人一腳

　　唔知大家有冇睇過網上一個KOL到中環IFC樓下街訪途人嘅收入，當中有啲外國人嘅一個月收入已經多過本地人嘅年收入。「可能你咁啱搵到外國生意人同本地小薯做比較啫」、「收入差距有好多因素：學歷、經驗、行業、年齡等等……」係呀！繼續搵藉口啦，你愈畀藉口就愈代表你其實歧視緊香港人！真係要代表大家多謝你踩我哋一腳！

　　麻煩各位尊貴讀者自己諗一諗，有冇試過因為對方係外國人，而對佢態度唔同？公事上，如果有同事點極都唔明，又唔跟guidelines做嘢，唔使一日，佢應該會由洗手間畀人唱到放工嘅路程上，從此職場再無好日子過；但相反如果係外國人同事，你就會對佢有無比耐性，甚至懷疑係咪自己英文唔好，表達能力差而自責，再繼而欽佩外國人唔跟guidelines做嘢真係think out of the box，敢於挑戰規限。真真正正表現出凡事都有兩面，只不過好嘅一面永遠都係面向外國人。你話自己唔係崇洋？你唔係崇洋，你係對本地人特別mean啫！

　　另外唔知大家有冇發覺，公司中嘅外國人都總係高級啲嘅！香港嘅本地公司、甚至中資公司，好多時都會以外國人擔任中、高層，但薯仔級別職位永遠只有香港人。有能力嘅外國人，大家心甘命抵，始終都叫山長水遠以專才身份將技能帶到香港，回饋返社會，刺激香港經濟；但冇能力嘅外國人，加上外國人辦事嘅隨性及得把口嘅態度，咁都比你越過一眾勤勞嘅本地打工仔，仲要一升就連升幾級，個個高薪厚職。都明嘅，有時候出去開會見人，有個外國人代表自己公司都好似國際化啲、高級啲咁；再唔係一句二句英文連珠炮發，bargain能力都高啲。有咩辦法丫，鬼叫「你係local，我係international咩？」認命啦香港人！

　　「扮工」情況比較唔同？唔緊要，我地跳出辦公室。當你做嘢做到個人開始focus唔到，甚至開始有幻覺，想離開一下大家獨自去公園吃個安靜的午餐。呢個時候，一個年約3歲嘅金髮白人小朋友以及另一個操流利普通話嘅中國籍小朋友，係你面前跑嚟跑去、尖叫、咆哮。你問心，有冇覺得白人小朋友硬係特別可愛啲，而中國小朋友「冇嚟家教」！點解？因為又係你內心心處嘅崇洋心作崇啊！

　　我哋香港人其實係有實力嘅，唔好下下咁自負，接受「外國人辦事能力一定高」嘅謬論。同時，都好想大家放開下思想，唔好咁崇洋。當你一個唔崇洋，影響埋整個風氣都唔崇洋，大家嘅能力先會浮面，到時先會有個公平嘅鬥爭。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇